Historie van Hughe van Bordeus

¶ Hoe hughe binnen Babilonien alleen quam ghereden totten amirael.

[fol. 29a(H)]

ALs hughe die zee ouer geset was so was hi blide ende nam orlof aen maleproen ende hi reet wech na babilonien. Ende als hy ontrent der stadt quam, so quamen hem int ghemoet wel .c. mannen met valcken ende sperweren op haer handen ende reden vliegen. Daerna quamen noch .cc. mannen met bracken winden, haes winden ende ander honden ende reden iagen. Daerna quam seer veel volcx die int velt ghingen schieten ende spelen. Ende als hughe in die stadt quam so sach hi ooc al die stat vol volcx ende een yeghelic maecte bliscap. Ende voor des amiraels hof wast oock vol volcx. Ende die amirael had bi hem in sijn sale .xxx.c. ridders ende veel ander heren ende princen. Ende waerom dat die edelen ende heren vergadert waren ende dattet volck al blijde was, was dese sake Het was op s. Jans dach te midde somer die de sarasinen vieren

[fol. 29b]

als wi den paesch dach doen, so dat op dien dach plagen die ghemeenten ende heeren te vergaderen ende hielden feest Ende huge verwonderde van al dat volc dat hi sach ende seide O here iesu waer sach Oyt man so veel volcx. Aldus was hughe in menighe ghedachten ende in groten sorgen denckende hoe hi den amirael soude moghen spreken Ende hughe reet in een herberghe ende bestelde sijn paert ende hi ghinc ten houe van den amirael ende hi clopte aen die poorte ende seide. Laet in ghy poortier, ick ben hier ghesonden vanden coninc van Mombrant, ende terstont sach de poortier dat vingerlinc ende seyde. Bi mamet heere sijt willecome, comt in ende doet al dat v belieft, hoe gaget met onsen here Dagayant. Doe seyde huge, dat suldi weten, ende mettien dede die poortier die poorte open ende liet hughen in. Ende als hughe binnen der poorten was so track hi sijn swaert wt ende sloech den poortier sijn hooft af. Doen wert hughe denckende dat hi nyet waer gheseyt en had ende seyde in hem seluen. Ay lacen wat salic maken, ic sorge dat co\ninc abroen sal op mi sijn vergramt om dat ic ghelogen heb als ic voor die poorte quam ende want op dat vingerlijn en dacht ic niet dat ic aen mijnen arm hadde. Ende so ghinc huge voort met grote claghen ende sorge tot aen die ander poorte ende hi riep doet op portier ende laet in coninc karels van vrancrijcx bode want ic wil spreken uwen heere den amirael Die poortier dit horende was seer verwondert ende seyde, bi wat manieren dorfdi hier comen. Doe seyde hughe, besiet wat rinc is diet die ic hier aen minen arm heb. Doe sach de poortieer wt ende hi sach den rinc Doe seyde de poortier, vrient mamet geef v goeden dach, wat doet ons here dagay\ant.

[fol. 30a(Hij)]

Doe seyde hughe, in trouwen dat suldi noch weten Ende die poortier ontdede die poorte ende Hughe is daer binnen ghecomen ende track sijn swaert wter scheyden, ende sloech den poortier op sijn hooft dat hijt hem cloefde so dat hi doot ter aerden viel. Ende doen is hughe ghegaen aen die derde poorte ende hi riep. Laet in, ic ben een messagier van coninc karel van vrancrijcke, ic moet spreken uwen here den amirael. Doen was die poortier seer verwondert ende seyde. Heere ick en mach v niet in laten voor datter ghegeten is. Doe seyde hughe, besiet dan dit vingherlinck, ende kendi dat niet. Doe sach dye poortier wtwaerts ende hi sach dat vingerlinc ende seyde Vrient goeden dach geef v mamet, wat doet ons here dagayant. Hughe seyde, dat suldi wel weten eer de amirael heeft ghegheten. Mer die poortier was seer coen ende stout van sijnen wercken ende hy heuet in sijn hant eenen stock van .vij. voeten lanck beslaghen met yseren plaen hebbende een groot metalen hooft, ende dat nederste was den sluetel daer hi die poorte mede ontdede, ende die stercke payen seyde, here ghi en dorft v niet ontsien te spreken den ammirael Gaudijs, want daer en is niemant also coene die v misdoen sal, oft hi soude comen in sware schade soo verre als ic desen staf hebbe maer hughe en antwoorde niet een woort, mer hi is die trappen op gheghaen in dye sale vanden palleyse daer alle dye heeren saten ende aten, ende Hughe mercte waer dat di alder hoochste tafele was ende hy kende ten laetsten den rijcken Ammirael Gaudijs, ende sach staen voor des amiraels tafel die grote ontsiende coninc van Anapele, die dicwils den kerstenen

[fol. 30b]

groot leet ende schade hadt ghedaen ende hughe trac sijn swaert ende seyde ic meyn v sijt op v hoede ende huge die sloech daer aender tafelen den coninc van anapele zijn hooft af dat spranc opter tafelen in een gulden cop. Ende mettien so heeft huge gesien des amiraels dochter die hi custe aen haren mont. Als hughe dus Claramonde in sinen armen greep so sach die amirael dat vingherlijn van dagayant steken aen hughens arm ende seyde. Nv doet al uwen wille ende al dat ghi begheert, wat doet ons here Dagayant. Hughe seyde dat sal ic v seggen den here dagayant heb ic verslaghen op dat stercke slodt te Dunalster, ende ooc nam ic hem dit scoon costelic vingerlijn. Ende ic seg v ghi moet mi gheuen dat haer wt uwen baerde ende v achterste vier hoeck tanden wt uwen monde want ic wil se hebben. Als dit die amirael hoorde wert hi toornich ende seyde tot sijn dienaers Vangt terstont den fransoys hi sal moeten steruen, ter quader tijt quam hi hier in mijn lant. Als dit die amirael gheseyt had so werden daer terstont veel messen getrocken, ende si sloegen op Hughe met grooter cracht van achter ende van voren, ende Hughe weerde hem vromelic mer hi en mocht niet staen tegen die grote macht ende menichte der sarasinen, mer hi versach hen ende liep op eenen stercken toren vanden paleyse ende daer blies hi sinen horen so dat si alle die daer waren rike ende arm, heeren ende knechten, edel onedel ginghen al tsamen dansen ende springen, ende die amirael ende sijn heeren dansten voor, door dat gheluyt ende vertuyt van dien horen, want noyt tevoren en hadden si so soeten gheluyt gehoort, ende die sarasinen riepen al lieue vrient blaset noch meer. Ende huge blies met sulcker cracht dattet die coninc Abroen hoorde ende hi seyde tot sinen heeren

[fol. 31a]

Nv is hughe weder in groter noot, maer ic en sal hem nv niet helpen om dat ic gram op hem ben, want als hi quam voor die eerste poorte van des amiraels hof daer seyde hi lueghenen, daerom sal hi veel lijden ende verdriets hebben, ende ic had hem verboden dat hi niet lieghen en soude, daerom en sal ic hem niet helpen noch bistaen. Ende die edel huge vernam wel dat die goede coninc abroen op hem gram was om dat hem gheen hulpe en quam.