Het hofken der geestelycker liedekens (1577)

Het hofken der geestelycker liedekens

(1577)–Anoniem Hofken der geestelycker liedekens, Het– rechtenstatus

Auteursrechtvrij

Vorige Volgende


[Al datter is op eerden] Een ander op die wyse. Ick wil mij gaen vermeyden aen eenen water cant. Al datter is op eerden Al datmen met ooghen aensiet Hoe groot dat is van weerden Ten mach mij troosten niet Voor dat ick coom hier bouen Al in die vreuchde der eewicheyt Daer alle die Enghelen louen Die heylighe Dryuuldicheyt. En alle die heylighe maechden Sij sijn verblijt al daer Sij staen met grooter vreuchden Al voor den spieghel claer Dat Godtlijck wesen dat sij Tot alder tijt aenschouwen Sullen sij inder eewicheyt In grooter vreucht behouwen. Hoe salt een hert versinnen Oft creatuere verstaen Die vreucht al vander minnen Die sij al daer ontfaen Sy staen voort Godtlijck beelt Met grooter dancbaerheyt Och weelden bouen alle weelden Is hen altyt bereyt Ende eewelyc sal dueren
[pagina ccviij]
Der Enghelen lof ende sanck Daer en is dach noch ure Noch sonnen onderganck Den dach der salicheyt Hy is ons opghegaen Met grooter vrolijcheyt Sal hy daer eewelyck staen. Claerder dan duysent sonnen Soo is daer Godts aenschyn Wie salt begrypen connen Hoe genoechlijck dat sij daer sijn Sij staen voor tgodtlijck beelt In vreuchden bouen natueren Die hem tot elcker uren Doet vernieuwen sonder trueren. Syn vederkens sijn opgheloken Sijn sijde is open ghedaen Daer alle reyne herten Hem in vermeyen gaen Hij schenct den lieuen maechden Den renschen coelen wijn Sij sullen aen sijnder tafel Daer altijt vrolijck sijn Die gordijnen sijn ghehangen Die slaepcamer is daer ree Hij heeft na ons verlanghen Die ouer schoone heer Hij schenct den lieuen maechden Den soeten nieuwen most Sij leyden daer den rey
[pagina ccix]
Met den Coninck al in sijn hof. Dauid al metter herpen Hij en cans ghespelen niet Die vreucht al vander minnen Die hij daer dagelijcx siet Voor Iesus als hij plach Hij liet sijn snaerkens clincken X. duysent hondert iaren En is daer maer eenen dach. Sij draghen gulden stucken Met peerlen al om set Waer dat sij henen treden Wort soeten roke gespreyt Sij draghen gulden oorden Ende eenen crans soo schoon Sij ontvanghen daer aureola Die alderschoonste croon. Sij singhen daer alleluya Dien costelijcken sanck Elcken voetstap die sij treden Geeft eenen sonderlinghen clanck Henen gaen sij treden Met grooter soeticheyt Hij verwacht die lieue maechden Met grooter vrolijckheyt. Sij singhen altijt sanctus Al sonder onderlaet Sij volghen daer dat lammeken Waer dat henen gaet Sij singhen sij discanteren
[pagina ccx]
Die vreuchde bouen natueren Sij brassen sij houeren Altijt in elcker uren Dauid al metter herpen Hij maect soo grooten gheschal Die herpen ende trompetten Die stelt hij ouer al Hij heeft in sijnder herten Een sonderlinghe gheluyt Hij speelt al daer den rey Al ouer des Conincx bruyt. Gulden sijn die straten Die poorten desghelijcx Die troonen bouen maten Sijn schoon en suyuerlijck Die mueren alte samen Sij blincken van peerlen fijn Hoe wter maten claer Moet daer die timmerman sijn. Noch isser een soo schoone Die hemelsche Coninginne Die met haren eenighen soon Regeert al dat ghesinne Daer toe is sij vercoren Die maget suyuerlijck Ende alle die Enghelsche cooren Regeert sij ende al dat rijck. Amen

Vorige Volgende

Over dit hoofdstuk/artikel

lied

Naar de Nederlandse Liederenbank