Het hofken der geestelycker liedekens(1577)–Anoniem Hofken der geestelycker liedekens, Het– Auteursrechtvrij Vorige Volgende [Myn lief is soet en suyuerlyck] Een liedeken op die wyse, te Mey als alle de vogelkens. &c. Myn lief is soet en suyuerlyck Schoon, edel, machtich, ende rijck Inder herten een iubileren Al int ontfanghen ghenuechlijck Dat willen wij Discanteren. Hy can afnemen wat v deert, Hij can v gheuen wat v herte begeert, Hy can v siele versaeden Hij es der maechdekens bruijdegom weert Een fonteyne vol genaden. Hy is die heer daert al aen staet Hy is myn hoochste toeuerlaet In alle mijnen lyden Hij is den troost die niet en vergaet Hij can dat herte verblijden O hooghe gebieder der Seraphijn Verwandelt ons nu water in wijn Gheeft den dorstighen te drincken [pagina cciiij] [p. cciiij] Op dat wij uwer soeticheyt in onse pijn Altoos mogen ghedincken. Och als die ziele dan sal gaen En laten dit dal der tranen staen En comen dan hier bouen Daermense niet versaden can Van minnen Godt te louen. Dan compt die bruydegom voor die poort Dan hoort die bruyt dat soete woort Compt in mijn suyuer vrindinne Daer ghij soo langhe hebt af ghehoort Dat suldi nv leeren kinnen. Dan wort die schoon bruyt ingheleyt En alle dinghen sijn daer bereyt Van buyten en van binnen Maer oft sij wt oft inne waerts geet Sij sal daer weelde in vinden. Die schoone tafel is daer bereyt Die dierbaer spijse is daer op gheleyt Men sal daer weirschap beginnen Iesus dient seluer ghelijc hij seyt Dat doet sijn groote minne. Daer compt ter tafelen dat hemels broot Den wijn is beyde wit en root Van sonderlinghen smaeke Daer worden sij droncken cleyn en groot Die in dat prieel gheraken. Daer is de bruygom selue de wairt Hij schinct den wijn al onghespaert Den wijn van grooter crachten [pagina ccv] [p. ccv] Daer Christus selue af is den wyngaert Men derffer niet lange na wachten. Och wat vreuchde mach daer sijn Daer Iesus seluer schinct den wijn In volle vergulde schalen Al wt die grondeloose fonteyn Daer machmen ghenoech wt halen. Die bruyt mach in des heeren wijn Wel altyt bly en vrolijck zijn Men sals haer niet benyden Maer wat sij haelt tis al betaelt Eest wonder al is sij blyde? Dan eest veruult dat sy hier seyt Die bruydegom heeft haer in gheleyt Hy gaf haer selfs te drincken Sy moest van grooter vrolycheyt In haers liefs armkens sincken. Hy is dat broot, hy is den wijn Hy is verdryuende alle pyn Hy is een iubileren Hy is den Coninck van Israhel fyn Den grooten Heer der heeren. Daer sal dat hert ontbonden syn En hebben vergeten alle pijn Men salder altoos aenschouwen Die hooghe heylighe Dryuuuldicheyt reyn Die vreucht altoos behouwen Des heeren paleys sal altyt staen Die groote vreucht en sal niet vergaen Men salse altoos beginnen [pagina ccvi] [p. ccvi] Die een is van danders vreuchde saen Vermaect in grooter minnen. O nieuwe Ierusalem schoone pleyn Dat ick v derue deert my certeyn Hoe vet soo syn v weyden Och hoe ghenuechelyck eest daer syn Wee hen die daer afscheyden. O Iesus uwen soeten naem Is eenen kelder met most ontdaen Een schoon prieel met bloemen Hoe bat gesmaect, hoe meerderen dorst Wanneer sal ick daer comen. Die wil comen tot deser hooger heeren sale Al tot dat liefelijck auontmaele Die moet al ouergeuen Al daer die quade natuere begeert Te leyden een steruende leuen. Die hier wil steruen, die sal daer leuen Die hier wil deruen, die salmen geuen Dat goet al bouen maten: Daerom laet ons steruen ende deruen En ons seluen laten. O Iesu minnelijcke heer Naer v verlangt my alte zeer Och helpt my nv verwinnen Want sonder v en vermach ick niet Van buyten noch van binnen. O ziele myn laet ons opstaen En met begheerten ouer gaen Alle dese hooge berghen [pagina ccvij] [p. ccvij] Soo mogen wij een leuendich leuen Vinden sonder steruen. Amen. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij