Het hofken der geestelycker liedekens

[Israel die dleuen groot en cleyne]

Den lofsanck gesongen van Barach ende Debora, als die bloedighe bij Sijsara versleghen was, Int boec der Rechteren. Cap. 5.

Israel die dleuen groot en cleyne
Vrijmoedich int perikel hebt gheleyt
Looft Godt den heere nv int gemeyne
Ghebenedijt sijn maiesteyt.

O heere als ghij door Seir sijt ghetogen
En door Edom dat roode sandt
Die hemels douden en die wolcken vlogen
Vol waters, deerde beefden aen elcken cant

Die vroomheyt was wt Israel verloren
Als Debora es cloeck op gestaen

[p. clxxxviij]

 

Nieuwe vendelen heeft Godt vercoren

 

En svyants poorten wech ghedaen.

 

 

 

Schilden, hellems, swerden en speren

 

En waren in Godts legher niet ghesien

 

Es Godt met ons wie can ons deren

 

Onsen vyant die moet voor ons vlien

 

 

 

Die Coninghen sijn ghecomen om strijden

 

Met den benden slands van Chanaan

 

Wat batet sij en sullen niet verblijen

 

Met ghelt oft roof wat hebben sij dan

 

 

 

Wt den hemel es daer teghen geuochten

 

Met den sterren in haren loop gestelt

 

Die daer stonden in slachordens gevlochten

 

En dreuen Sijsaram wt tvelt.

 

 

 

Ghebenedijt bouen allen vrouwen

 

En groot geacht sijt ghij Iahel

 

Die met den naghel sonder flouwen

 

Bringt Sisaram in sdoots gequel.        Prince.

 

 

 

Prince dus sullen sij alle varen

 

Godts vyanden seer fel en quaet

 

Godts vrinden sullen naemaels openbaeren

 

Als die son in den daegeraet.