Het hofken der geestelycker liedekens

[p. clxij]

[Trueren alle die willen]

Op die wyse: Het souden drij ghespeelkens goet spaceren gaen in dat wout.

Trueren alle die willen.
Mijn trueren is ghedaen
Ick heb van Iesum mijnen lieue
Soo goeden troost ontfaen.

Hij was verbolgen seere
Godt danck tis al ghedaen
Hij wil met grooter eere
Ons arme sondaeren ontfaen.

Wij louen sijnen name
Om al dat groote goet
Het is ons seer bequaeme
Dat hij ons altijt doet.

Maer dat hij noch doen sal
Dat wert dat beste deel
Dat is ons een goet geual
Hij wert onse al geheel.

Nae deser tijt gegheuen
In eewigher sekerheyt
Daer toe dat eewich leuen
Dat heeft hij selue geseyt. Amen.