Het hofken der geestelycker liedekens(1577)–Anoniem Hofken der geestelycker liedekens, Het– Auteursrechtvrij Vorige Volgende [O Iesus minne wat hebdi ghemaeckt] Een gheestelyk lieden op die wyse. Het viel op eenen donderdach. O Iesus minne wat hebdi ghemaeckt Wat hebdi nv bedreuen Ghij hebt v seluen aent cruyce naeckt Om onsent wil ghegeuen. U leste auontmael hebdi bestaen Ghij ginckt die voeten wasschen Ghij hebt soo grooten deucht gedaen Om ons arm wormkens van asschen. Int auontmael hebdi om ons ghedacht Een om ons salich leuen Wie had oyt sulcke minne verwacht Ghij hebt ons v seluen gegeuen. Ten hofken gingdi corts daer nae Den strijdt gingdi beginnen In bedinghe gaefde v aldaer Met alsoo grooter minnen. Ter aerden laechdi gestrect al plat V knien gingdi booghen Van bloedich sweet wordi al nat Ghij hadt die passie voor ooghen. U herteken was in grooten noot Want ghij hebt selue ghesproken Ick ben bedroeft al totter doot Bij nae waest herteken ghebroken. Uan daerde sijdy opghestaen Als ghij saecht comen die Ioden [pagina cxlviij] [p. cxlviij] Ghij sijt hen int ghemoet ghegaen En hebt hen v seluen geboden. Iudas quam daer onbeschamt Ghegroet sijdy sprack hij meester mijn Al cussende hebdi hem ghenaemt Met soete woorden v vrint te sijn. Och Iuda dief wat hebdy gevrocht Wat hebdi nv bedreuen Al cussende hebdi mijn lief vercocht Om xxx. penningen gegeuen. Die schaer quam binnen inden hoff Ghij vraechden wie sij sochten Sij riepen Iesus van Nazareth Soo luyde als sij mochten U Godtlijcke stemme was seer groot Ick bent sprack uwen soeten mont Sij vielen alle ter aerden als doot Ghij maectense wederom gesont. Wt minnen hebdy v laten vangen Voor ons wordy gebonden Sij smeten v aen v soete wangen Gelijck verwoede honden. Ghij liet v binden als een dief En al wt charitaten Dus wordy gesleypt mijn soete lief Al lancx die buyten straeten. Sij stieten, sij trocken v metten haer Tot dat sij v by Annas brochten Van v verlossinghe hadden sij vaer Om valsche getuygen sij sochten [pagina cxlix] [p. cxlix] Bloetgierich liepen sij wt den huys Tot Caiphas sijdy ghesonden Om uwen doot was haer concluys Twee quade getuyghen sij vonden. Uan blasphemien spraken sij v verwijt Sij verbonden v ooghen claere Sij smeten, sij riepen met grooter spijt Segt ons wij smit v daere. Haer spotten haer spouwen en lieten sij niet Het scheen sy souden v verbijten Van allen den nacht en sliepen sij niet Sij vochten omt voorsmijten. Des daechs storfdi voor mij die doot Snachts waerdy voor mij gesmeten Die minne is wter maeten groot Hoe soudickse moghen vergeten, Sij leyden v tot des richters hoff Sij trocken v met den baerde Al die v smeten, die spraken sij loff Och volck van quaeden aerde. Pilatus excusatie en hielp al niet Sij en wilden v niet quijt laeten Cruyst hem, Cruyst hem wats gheschiet Riepen die principaten. Sij doorgeesselden v soete lijf Een croone hebben sij gevronghen V bloet liep als beken wt Als sij was inne ghedrongen Pilatus verwees v gelijc een dief V cruys moestij selue dragen [pagina cl] [p. cl] Ic wil v volgen mijn soete lief En loochenen alle mijn magen. Der hemelen glori wert daer begect Des allen die Inghelen treurden Mijn lief wert daer opt cruys gereckt Dat alle sijn aderkens scheurden. Hij heeft ghesproken met herten coen So hij hinck aent cruys verheuen O vader sij en weten niet wat sij doen Wilt hun dit doch vergeuen. Ghedinct mijns sprack die scheker met desen Ghij sprackt met goeden aduijse Noch heden suldi met mij wesen Al in den paradijse. Gelijc het seyl hangt inden wint Soo hinc des werelts behoeder Doe sprack hij, wijf siet hier v kint Ioannes siet hier v moeder. Mij dorst riept ghij het was doch waer Al nae mijn salichede Gal en edick gauen sij v daer Met groote nijdichede. Ten lesten riep Iesus met grooter cracht Daer ick ben om ghesonden Het is nv altemael volbracht Ick heb mijn bruyt gheuonden. Nv beuele ick mijnen gheest O vader in uwen handen Hier leedt die sone Gods aldermeest Met perssen en met banden. [pagina cli] [p. cli] O vader, o Godt, o Iesus lief Wilt mijns doch nv ontfermen Beschermt mij voor den helschen dief Brengt mij in uwen armen. Iesus passie en sijn bitter doot Dat is nv mijn diuyse Iesus helpt mij wt alder noot En bringt mij inden paradyse. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij