Het hofken der geestelycker liedekens

[Hoort toe ghij sondaers alle ghemeyn]

Een nieu Liedeken, op die wyse Den lustelycken Mey is nv inden tyt.

Hoort toe ghij sondaers alle ghemeyn
Wilt niet mistroostich wesen
Gaet al tot Christum dat edel greyn
Die mach onsen druck ghenesen
Soo ons die schriftuere wtleyt
Godt die is altijt bereyt
Te vergheuen onse misdaden
Christus sprect, compt alle die zijt beladen.

God heeft ons soo lief dat hij ons bemint
Esaias doet ons dat weeten
Alwaert dat een moeder haer eyghen kint
Soude moghen vergheten
Hij en vergheet ons nemmermeer,
Christus die almoghende Heer
Want wij sijn alle sijn graden
Christus spreect compt alle die zijt beladen.

Magdalena diemen die sondersse heet
Daer mochtmen wel aenschouwen
Ende van Zacheus niet en vergeet,
Daer hij maeltijt ghinck houwen

[p. ciiij]

 

Noyt sondaer en quam daer soo groot

 

Die hij zijn ionste niet en boot,

 

Hij en thoonde hem sijn ghenaden

 

Christus spreect, comt alle die zijt beladen.

 

 

 

Hij is den wech als daer staet gheschreuen

 

Een Heer bouen alle heeren

 

Die waerheyt is hij, ende oock dat leuen

 

Waer wilt ghij anders keeren

 

Hij is die dore die open staet

 

Daermen totten vader gaet

 

Niemant wil hij versmaden

 

Christus spreckt, compt alle die zijt beladen.

 

 

 

Dus wilt betrouwen in Godt des vreden

 

Wilt sijn gheboden houwen

 

En wilt den buyten wech niet treden

 

Soo sult ghij zijn rijck aenschouwen

 

Ende houdt altijt accoort

 

Ende sijn Goddelijck woort

 

Wilt treden nae zijn paden

 

Christus spreect, compt alle die zyt beladen.

 

 

 

Godt worde voor ons aent cruyce gherect

 

Met sijn ghebenedijde leden

 

Die Ioden hebben hem soo seer begheckt

 

Den moordenaer heeft hem ghebeden

 

Met woorden seer soetelijck

 

Beloofde hij hem sijn eewich rijck

 

Noch en quam hij niet te spade

 

Christus spreect, compt alle die sijt beladen,

 

 

 

O Princelijcke Godt inder eewicheyt

 

Roept, Heere compt ons te baten

[p. cv]

 

Sijn armen heeft hij wijt wt ghespreyt

 

Hij en wil ons niet verlaten

 

Hij is eewich ghebenedijt

 

Peyst dit altijt wie dat ghij sijt

 

Ende wilt v wijsselijck beraden

 

Christus spreect, compt alle die zijt beladen.