Het hofken der geestelycker liedekens(1577)–Anoniem Hofken der geestelycker liedekens, Het– Auteursrechtvrij Vorige Volgende [Hoort toe ghij kersten sinnen] Een gheestelyck liedeken. Op die wyse. O radt van auontueren. Hoort toe ghij kersten sinnen En wilt niet sijn beswaert Alle die Godts woort beminnen Soo ons Ioannes verclaert Int viij. Capittel beschreuen Hoe Iesus smorgens vroech Ghecomen is inden tempel Leerende tvolck met woort en exempel Den Pharizeen spyttet ghenoech. Die Pharizeen quaet van ghedachten Voor Iesus op dat pas Een vrouken dat sij brachten Die in ouerspel beuonden was Sij seyden dese vrou is beuonden In ouerspel met boosen gheschal Dus hier ouer wilt vonnisse gheuen In Moyses wet staet gheschreuen Datmen sulcke steenen sal. Om Iesus tachterhalen Hebben sij dese list gheleyt. Want hij met soeter talen Altoos sprack van bermherticheyt [pagina cvi] [p. cvi] Om Iesum tondersoecken Oft hij soude hebben geseyt Datmense soude steenen Die was haerlieder meenen Dat en ware gheen bermherticheijt. Christus die Heer vol waerden Die booch hem neder saen Ende schreef daer inder aerden Wat sij selue hadden misdaen Sij laghen daer int ronde Op malcanderen alle ghemeyn Hoort wat hen Christus oorconde Die van v is sonder sonde Die worpe den eersten steen. Hier bij mogen wij bedieden Dat een ijegelijck wel verstaet Sijn houeken suyuer sal wieden Eer hij in eens anders gaet En wilt gheen vonnisse gheuen Daer ghij selue in schuldich sijt Want sij sagent daer beschreuen Haer misdaet dat sij hadden bedreuen Dwelck ons deuangelie belijdt. Die Pharizeen gemeyne Sijn altesamen wech gegaen Ende lieten daer alleijne Het vrouken voor Christum staen Christus al sonder sparen Hij vraechde tvrouken saen Waer dat sij waren geuaren. [pagina cvij] [p. cvij] Al die haer quamen beswaren En haer beschuldicht haen. Heeft v yemant verdoemt van desen Heeft Christus dat vrouken gevraecht Och niemant Heere gepresen Sprack dat vrouken seer versaecht Soo en wil ick v niet verdoemen Sprack tot haer Christus die Heer En dient gheen vreemde afgoden, Gaet leeft nae mijn geboden En sondicht voordaen niet meer. Die bermherticheijt ons Heeren Moghen wij hier bij verstaen Elck die hem wilt bekeeren Al is hij met sonden belaen Wilt hij voort deuchdelijck leuen Hij wordt van Christus bevrijdt Maer en wilt gheen oordeel gheuen Daer een ander om soude sneuen Op dat ghij oock niet geoordeelt en zyt. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij