Het hofken der geestelycker liedekens(1577)–Anoniem Hofken der geestelycker liedekens, Het– Auteursrechtvrij Vorige Volgende [Al daer heer Iesus quam ghegaen] Dit liedeken gaet op die wijse van Guijchelman. Al daer heer Iesus quam ghegaen En daer vant hij een vrouken staen Ioncvrouken wildij met mij gangen Ghij hebt mijn herteken alleen gevaen O troost naer v staet alle mijn verlangen. O Heere beyt eenen corten tijt. Die werelt biedt my soo grooten solyt Laet mij haer weelde noch wat gebruyken Ic bid v om een cleyn respijt Dan sal ic v mijn herteken ontpluyken Ioncvrouken ten mach v niet geschien Wilt die valsche werelt vlien Wilt v natuerken leeren steruen Wilt v voor svyants lagen versien Oft ghij sult mijnder minnen moeten deruen. Moet ic den swaren wech ingaen Ick en hebben mijn dage noijt bestaen Hij es mij alte hert om treden Siet doch mijn teer natuerken aen O heer ick bid v, laet mij doch met vreden. [pagina xciij] [p. xciij] Met vreden en moochdij blyuen niet Die werelt loon es swaer verdriet Ick duchte sij soude v herteken verleyden Sij is min dan een ijdel riet Ick bid v wilt v vander werelt scheyden. Die reden sou geerne gehoorsaem sijn Natuerken die doet mij soo groote pijn Sij wilter alte qualijck aene Och heere wilt mijnder genadich sijn Den wech verdriet mij alte seer te gaene. Wilt v oochskens eens op mij slaen Dinct hoe ic v ben voor gegaen Hoe veel dat ic hier heb geleden Ghij hebt my gecost soo menigen traen Al totter doot heb ic om v ghestreden. Den wech wil ic vromelijc bestaen O heere met dij wil ick nu aangaen Dat is lief en leedt met v te dragen Dat heeft v hooge minne al gedaen Hoe soude ic derren creunen oft clagen. Hij nam die maget bijder hant Al ouer berch en ouer lant Hy en woude niet langer met haer beyden Tot dat hij daer een cloosterken vant Daer hij sijn lieue bruyt ghinc leyden Hier binnen sloot hij dat duyflien soet Hij gaf haer alsoo grooten moet Der minnen const ghinc bij haer leeren Hij hilpse in spoet in weder spoet Dies dancten sij den grooten heere der Heeren [pagina xciiij] [p. xciiij] Maer die dit liedeken ierstwerf sanck Die is nv in heer Iesus bedwanc Sij is soo wel met hem te vreden Al comender vlaghen in cort int lanck Sij weet certeyn dat hier moet zijn gheleden. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij