Het hofken der geestelycker liedekens (1577)

Het hofken der geestelycker liedekens

(1577)–Anoniem Hofken der geestelycker liedekens, Het– rechtenstatus

Auteursrechtvrij

Vorige Volgende


[Wildy hooren lesen] Hier nae volgen die xli. Leysenen vander Gheborten ons Heeren Iesu Christi. Wildy hooren lesen Hoe Christus geboren was Van eender suyuer maget ionck Dat ons groote salicheyt was Dat die heere van hemelrijcke Woude sijn geboren op aertrijcke Kyrieleison,
[pagina lvi]
Doen si alle ter hellen waeren Die Iesum hadden gedint Abraham Isaac, ende Iacob, En Moyses ons Heeren vrint Doen sij lagen in des duyuels slot Sprack doen ons lieue Heere Godt. Kyrieel. Engel Gabriel compt tot my Ende gaet daer ick v senden sal Te Nazareth dat seg ick dij Daer suldi vinden een maget smal Gaet met alsoo goede moet, Ende segt haer dat ickse seer groet. Kijrieel. Gabriel hadt schier verstaen Hij dede dat hem sijn meester riedt In Nazareth is hy gegaen Des en wilde hij laten niet Hij dede Maria soo wel verstaen Dat sy den sone Godts soude ontfaen Kyriel. Doen Gabriel die Ingel quam Daer hy Mariam vant alleyn Hy seyde Godt gruete v vol gratien Met Gode moet ghij syn gemeyn Ghebenedyt sydi bouen alle wyf Suyuer ende reyn is v lyf. Kyrieel. Doen Maria den Engel hoorde Was sij veruaert ende docht Wat die bootscap bedien mocht Die haer die Engel brocht Want sij was een ootmoedich wijf Suyuer ende reyn was al haer lijf.
[pagina lvij]
Die Engel sprack en twijfelt niet, God die Heere is bouen al Het moet al sijn dat hij gebiet Wat oijt was oft wesen sal Hij maeckt van een woordekijn Vleesch ende bloet al sonder pijn Kijrieel. Die Engel sprack, en sijt niet veruaert Dese waerde bootscap die breng ick v Die Goddelijcke cracht is in v verbaert Die heijlige Geest sal comen in v Aldus suldij dat kint ontfaen Ende maget blijuen sonder waen Kijrieel. Maria ghij sult den sone Gods baren Sonder wee oft sonder pijn Ende maget blijuen ghelooft die maren Iesus sal wesen den name syn Hij sal die sondaren bekeeren Den wech ten hemelrijcke leeren. Kijrieel. Hij sal sijn coninck ende Heer Ouer al die werelt wijt Dat sal dueren emmermeer, Dies sij Godt gebenedijt Dat ghij daer toe sijt vercoren. Dat Godt van v wilt sijn geboren. Kirieel. Maria sprack Godt ter eeren Heer Engel heb ick v gesien Siet hier die deerne des heeren Naer vwen woorden moet my geschien Met dien woorde si dat kint ontfinck Dat was ons allen een salich dinck. Kyrieel.
[pagina lviij]
Maria ick sal v doen verstaen Van uwer nichten Elizabeth Sij heeft in haren lichaem ontfaen Den genen die stercken sal Godts wet Het gaet der sester maenden aen Dat hem Zacharias gewan. Kirieel. Maria ginck met vreuchden rijck Tot haerder nichten daer syse vant Sij groettense wel ootmoedelijck Elck dede den anderen vreucht bekant, Tkint dat Elizabet droech, Dat keerden hem om, ende het loech. Kyrie. Deus meus hoe moch dit zyn Dat die moeder Godts mijns Heeren Tot mij coempt die maget fijn, Hoe mach ick Gode dancken ter eeren Die vrucht daer ick me ben gebonden Drijft groote vreucht tot deser stonden. Kirie. Maria droech die weerde dracht Negen maenden alst wesen soude Tot op den heyligen Kers nacht Dat Iesus geboren wesen soude Te Bethleem in eender schuren Ten had wech, venster, oft muren. Kirie. Ioseph die was daer bij alleyn Daer Maria vander vrucht genas Sonder wee en sonder pijn Van een kint dat schoone was Hij is mensche ende Godt Die daer aen twijfelt hy is sot
[pagina lix]
Daer mochtmen bijder moeder sien Tkint in arme doecken gewonden Voor eenen oss, voor een eselkijn die daer voor die cribbe stonden Loofden tkint van grooter waerden dat gecomen is op deser aerden, Kyrieel. Den asem van dese stomme beesten die wt haren neusen ginck dat was al die warmenisse die onse Heere daer ontfinck Al daer hij lach tusschen twee dieren, Anders en quam hij bij geen viren. Kijrie. Op een luttel hoijs sijn hooft lach. die herde plancken sijn wiege stroo Iosephs cousen men daer sach Hij isser mede gedeckt hij wilde alsoo Die Heere is van hemelrijcke Een geweldich God van aertrijcke. Kirie. Die Engelen werden haest gewaer, Alsoo saen alst kint geboren was Gloria in excelsis daer Songen sij dat scoone was Dat is inden hemel loff ende eere Pays verleen ons hier Godt die Heere. Die Engelen tot die herderkens spraken, Herderkens groot en cleijn Wij willen wachten vwe scapen Loopt tot Bethleem gemeijn. Wij brengen die eerste bootschap, v Dat God is geboren nv Kiriel.
[pagina lx]
Daer suldi vinden een kint geboren Ende in doecxkens gewonden By hem die maget wtuercoren Ende osse ende esel ten seluen stonden Die herderkens werden geloouich daer Dat Iesus Christus geboren waer. Kyrieel. Tot Bethleem liepen die herderkijns Ten huyse daer sij tkint vonden Van eender maget sonder pijne Gheboren in doecxkens gewonden Die herderkens vondent in een cribbe geleyt Als hem die Engel hadde geseyt. Kyrie. Doen ginck op een lichte sterre Dat noijt te voren was gesien Drie Coningen quamen van verre Sij wisten wel dat soude geschien Dat geboren was een Heer. Die Heere soude blijuen immermeer. Kiriel. Elck vanden heeren raet namen Dat sij wilden varen soecken Onuersienelyck sij te gader quamen Alsoo wy vinden in die boecken Op dromedarien dat sij reden En presenteerden den Heere der vreden. Kyrie. Die sterre ginck vaste voren Die Heeren reden nae wel seere In een stadt daer sij herberge coren Daer Herodes in was heere Doen verloren sij die sterre Dies waren die Heeren erre. Kyrieleijs.
[pagina lxi]
Herodes fel vol ongenaden Dede vragen haestelijcke Wat die Heeren al daer daden Alsoo verre wt haren rijcke Sij seyden Heere wildijt hooren Daer is een ionck kint geboren Kijrieel. Als Herodes dat verstoet Was hij droeuich ende in vaer Hij dede vragen al metter spoet Waer dat geboren waer: Sij seijden te Bethleem Iude, Dat dede Herodes wee. Kirie eleyson. Hij seijde wildi soeken varen Haestelijck in veel steden Vindijt wildyt my openbaren Dat kint wil ick oock aenbeden Dat dede hij dus die heeren verstaen Hy meynden dat doot te slaen. Kiriel. Sij seyden dat kint willen wy gaen soeken Dat alder werelt heeft gewout Ons offerhande vintmen in boecken Dat is mirre wieroock ende Gout Dat sullen wij hem te gifte geuen Dat hij ons breng int eewich leuen. Die Heeren namen oorlof Met haesten ruijmden sij die stadt Maer als sij quamen buijtent hof Ende wilden vragen naer den pat Sagen sij die sterre claer Die voor ginck sij volchden naer Kijrieel.
[pagina lxij]
Als die sterre quam bouent huijs Daer dat soete kint geboren was Bleef sij staen, alsoo wildet Iesus. die heeren waren blijde das Sij knielden neder al op die stat Ende sij onteden haren schat Kiriel. Int huijs quamen die heeren rijck dat kint sadt op der moeder schoot Sij knielden seer ootmoedelijck Ende offerden hem dat Gout bloot daer toe wieroock, ende mijrre, Aldaer hadse gebrocht die sterre. Kijriel. Oorlof nam elck heere vercoren Ende wilde tot herodes waert, Snachs quam haer eenen droom te voren Soo dat achter bleef die vaert, Eenen anderen wech sij daer namen daer sij tot haren lande quamen Kijrie. Als Herodes vernam die maer dat die heeren waren leden Bij anderen wegen al openbaer Tot haren lande sijn sij gereeen Verloren was al sijn toeuerlaet Hij peijsden om eenen valschen raet. Kirie. Hij geboot allen die ridders stout Alle die knapen, kinderen te vaen die onder twee iaren waren oudt die dede hij al den doot ontfaen dus meijnde hij dat kint te verdoen dat hem in Egipten was ontvloen. Kijriel.
[pagina lxiij]
Wildijt hooren ick maeckt v vroet Hoe veel der ionger kinderen waren Xliiij duysent, die al storten haer bloot Ende storuen martelaren, Sij singen dagelycx den lof. Kyrie. Als die veertich dagen waren leden Wilde Maria ter kercken gaen Nae die wet, nae die seden, dat soete kint nam sij saen Ende turtelduyuen een paer Offerde sij inden tempel daer. Kijrie. Als Sijmeon dat kint onfinck Maecte hij den Nunc dimittis, Ende voorseijde een waer dinck de Passie ons liefs Heeren Christi, dat lijden ende den swaren rouwe. die soude hebben onse vrouwe. Kijrie. Nu weest willecom Iesu Christ, Weest willecom lieue Heere Want ghij onser alder heere bist. Ghelooft soo sijt ghij immermeer In hemelrijck eest alsoo schoone, Ende ouer al in haren throone, Kijrie. Nu laet ons bidden tot allen dagen Godt, ende die lieue moeder sijn Dat sij ons van allen plagen Behoeden in onser laetster pijn, Ende ons nae dit corte leuen, Hemelrijck wil gheuen. Kijrieeleijs.

Vorige Volgende

Over dit hoofdstuk/artikel

lied

Naar de Nederlandse Liederenbank