De historia van den souen wysen meisteren

De vader entfink den sone myt den souen meysteren.

DE souen meystere quemen to samene, vnde nemen den knapen, vnde cleden ene na syner weerdycheyt, vnde hadden wol by xx basuneren, vnde mannich seyden spyl. vnde em drank so groet volk na, vnde yleden vro na dem pallase vnde laueden gade. De keyser horde den schal so groet vnde vragede wat daer were. Me sede em dat yd sin zone were, de queme eerlyken vnde myt grotem volke vnde myt synen meysteren. De keyser ghynck em entyeghen. vnde do de sone synen vader sach. Do nyghede he em vnde vmme venck ene vnde sprack. Myn leue here vnde vader, goth grote dy, vnde alle gelucke mote dy volgen to deme lyue vnde to der selen. Do de vader syne stymme horde, do vyl he nedder vp de eerde, vnde van groter vroude so quam he van sick sulues. De iunghe here wolde nicht meer spreken, wente yd was so grot gescrey van dem volke, dat nemant den

[fol. 30r]

anderen mochte horen. De keyser heth suluer vnde golt manck dat volck warpen, dat se yd nemen vnde enwech gyngen. Nemant wolde dat nemen, also girich weren se, vp dat se den heren mochten horen spreken. Do leeth de keyser beeden by deme leuende dat men sweghe. Do dat volck nu swech, do sprak de here. Ik en wil nicht spreken, eer gy de keyserinne myt alle eren iuncfrouwen hetet heer gaen. De keyser sande tohant na eer, dat se queme myt alle eren iuncfruwen. Se quam gantz leydich vnde bedrouet. he leth se an enen rinck staen. Do sprack de iunge here to deme keysere. her vader, see gy yenne iuncfrouwe in deme gronen ghewade dar staen, De keyser sprak. Ia se is eer leeuer wen de anderen alle. he sprack. hethet eer aff theen dat ghewant, so weerde gy ghewar iuwer vrouwen truwe.