De historia van den souen wysen meisteren

Hir deit de keiserinne ouer gantz ouel.

DO nu de keyserinne echts vernam, dat he des daghes nycht scholde steruen. Do to reth se ere ghewant van leyde, vnde veel eer suluen in de haer, vnde schrey vnde weende gantz ouel. De keyser quam to eer vnde troste se vnde sede Du stellest dy dar vp myt alle diner craft, wo dat ik mynen sone dode. Men de meystere en radet my des nicht, vnde weet nycht wat to donde is. De keyserinne sprack. Loue gy en beth wen my, dat wert iuw weerlyken ruwende, vnde gy en wynnen nycht daer ane. iuw gheschuet also eens enem konynge vnde sineme marschalke gheschach, de enes boesen dodes storuen, vnde de konynck waert ock bedraghen van souen wysen, also gy ok nu hebben. De keyser sprak segge my wo gheschach deme. Se sprak. dat wil ik iuwe seggen wylle gy dat verstaen. ¶ Id was een konynck, de was gantz seer gheswollen, vnde de konynck was een heyden, vnde sette syck vor, dat he wolde nemen sunte peter vnde pawels hyllychdom to rome, to ener smaheyt der cristenheyt, vnde hoff sick vp myt groter gewalt yegen rome, vnde wart vnderweghen heerschop driuen in ener stat, vnde do id in der nacht was. do sprak he to sinem marschalke, dat he em ene vrouwe schyckede dede schone were. De marschalk sede. Gy moten eer vele gheuen vmme iuwes gebrekes willen. De konink sede, ik hebbe genoch, wyl ene nycht hundert ghuldene, so gheue ick eer dusent. De marschalck hadde de pennynghe leeff

[fol. 22v]

vnde geyt hen to syner egenen vrouwen, vnde bath se dat se by deme heren leghe de nacht. So wolde he se em by der nacht bryngen, vnde by der nacht wedder enwech bryngen, dat se de konynck nycht mochte bekennen. De vrouwe sprack. Des en do ik nicht dat ick dorch ghudes willen myne eere verlese. He drowede der vrouwen vnde sprack, dede se des nicht se en leuede nummer enen ghuden dach myt em. vnde sprack so vele dat se dat dede. Do brochte he se dem heren by der nacht, vnde sede em he moste eer dusent gulden geuen. De here sleep de nacht by der vrouwen De marschalck quam to der metten tijt, vnde hadde de vrouwe gherne enwech ghevoert. De konynk sede, se beuelt my wol, ick een wyl se noch nycht van my laten. Dar na ouer ene cleyne wyle versochte he yd ouer, de konynk wolde se em nycht lathen. Do yd nu dach wart, do quam he ouer, vnde mochte sik nicht lenck entholden vnde sprack. Here yd is lycht dach, gy wyllen de vrouwe vnde my vmme ere eere bryngen, yd is myn vrouwe. De konynck sprak. Do vp dat vynster vnde laet den dach hyr in, vnde do de konyngk sach dat yd des marschalkes wijff was. Do wart he tornich vnde sprack. du boze ridder, wo hest du so mortlick ghedaen dorch gudes wyllen, make dy drade vth dem lande, of du most steruen. De marschalck moste vth dem lande, vnde de konynk behelt de vrouwe in groten eeren.