wo de here leeth syner vrouwen de aderen slaen vp beyden armen.
DO yd nu vro des morgens wart, de here stunt vp vnde ginck to der kerken, als sin wonheyt was, vnde leeth de vruwe lyggen Do he nu hadde misse ghehort, do vant he enen scherer. He sprack. Ach leue gheselle, kanstu to der aderen laten, also ick dy segge. Ia here wol sede he. De here nam ene myt sick, vnde heth de vrouwe vpstan Se sprak, id is noch nycht prime tijt. Wol vp sede he du must laten. O we sprak se, ick en leeth noch ny meer. De here sede, darumme bystu nycht ghesunt. Se moste vpstaen. de scherer leth eer vp enem arme beth se beswogede. Do se to sik suluen quam. he sede. strecke heer den anderen arm ok. Se sede. myn here verbarme dy ouer my, anders ick sterue. De moder quam. do se de sake vernam, do wart se van herten vro, also der rechtuerdygen vrouwen een, vnde sprack spotlyken tho erer dochter. Segge my myn dochter. Wultu noch den papen so leeff hebben dat dy nemant dar van sturen mach. Do antweerde de dochter. Neen anders nemande wen mynen heren. Do sprack de meyster to dem keysere. here wat dunket iuw. He sprack. phi se is een boze wyff ghewest
Auteursrechtvrij