De historia van den souen wysen meisteren

wo de keyserinne kumpt to dem keisere vnde deit ouer gantz ouel.

DO nu de keyserynne vernam, dat he des morgens nycht scholde steruen. Do hoff se sik endichliken to dem keiser myt schrien vnde myt weenen, vnde sprak ok een exempel to dem keysere, vp dat se ene grymmich makede yegen synen sone vnde sprak. Here id is gewest een keyser, de hadde enen deergarden. dar ynne was een euer so grymmich, dat he vele mynschen verderuede. Do leth de here vth ropen, we daer were de den houwenden euer dode. dem wolde he geuen syne dochter, vnde dat ryke na sinem dode. Nemant wolde sik des vnderwynden, noch ridder noch knecht. Do geschach id dat een herde ouer dachte, mochtestu den euer ouerwynnen, du alle de dynen weren iummer heren, vnde verwoch sik siner vnde gink in den deergarden. De euer leep ene an myt groter vnstummicheyt. de herde klam vp enen bom de was vul vruchte, vnde warp se dem euer dar aff. De euer beghunde de vruchte to ethende beth he rechte sath wart. do begunde he myt sick sulues to schimpen

[fol. 10v]

de herde begunde en myt ener hant to clouwende, myt der anderen hand toch he hemelyken een messer vth vnde de euer begunde entslapen van deme clouwende. vnde do dode de herde den euer, vnde em wart de dochter vnde dat konynckryke. Do sprack de keyserynne, here hebbe gy my ghemerket. Ia sprack he wo meenstu dat. Se sprack. here gy synt de starke euer wedder den nemant en mach. De herde myt syner kulen, dat is de vervlokede persone iuwes sons, de vatet an myt deme staue syner kunst iuw to bedregende. darumme dat em dat rijke weerde. De keyser sede, dat he my nycht weerde doen als he den euer bedroch. morgen moet he steruen.