Handschrift Berlijn mgo 185 (15de eeuw)

Handschrift Berlijn mgo 185

(15de eeuw)–Anoniem Handschrift Berlijn mgo 185– rechtenstatus

Auteursrechtvrij

Vorige Volgende


[lied 75]
die is die moelen vander hoectyt toe mydwynter 1 Ene moele ic bouwen wil here god wost ic waer mede had ic holt gerede ende woste war van dan soe wolde houwen aen 2 Toe holte wil ic varen heen dat wolt en is my niet vere hulpe had ic geerne die wosten wal
[pagina 258]
Hoe men boemen vellen sal 3 Dat wolt dat heytet lybanus daer wassen cedrus schiere sypressen ende ryuieren ende palmen stolt oliua dat walnutte holt 4 Och meyster hoech van costen ryck du moges my synne geuen houwen snoeyen ende euen ende voegen dat slicht soe wort die moelen wal bericht 5 Moyses nv wees du daer by den ouersten steen berichte dat hi ligge dichte soe draget hi swaer die olde ewe die meyn ic daer
[pagina 259]
6 Die nye ewe den ouersten steen den legge ic op den olden dat hi loepe bolde nae meysters const den dryuet des hiligen geestes gonst 7 Jheronymus Ambrosius Gregorius Augustynus bewaert gi ons die moelen ende dat kamer raet mit kammen wal berichtet dat 8 Ghi tweelf apostelen gaet hier voer maeket gi die moelen gaende dat sy niet en blyue staende gy syt gesant te maelen auer al dat lant
[pagina 260]
9 Ghigon physon eufrates tygrus gi vloeden viere ghi edel stolte ryuieren gi hebt waters genoech geuet der moelen oer geuoech 10 Een Joncfrouwe had een sackelkyn mit weyte wal gebonden al totter seluer stonden ter moelen quam een prophete dat vernam 11 Ysayas lange te voeren hadde daer oec voel van gescreuen hoe ons worde gegeuen een Joncfrouwe weert die eens kyndes hadde gebaert 12 Syn naem die is emanuel den
[pagina 261]
sulle wi alle lauen guetlic van hier bauen hier tot ons quam des vrouwen sich vrouwen ende man 13 Der ander propheten is so voel die daer van hebben gesongen het is oec wal gelongen ende vollenbracht dat scach tot eenre myddernacht 14 Doe die nacht die corte nam die dach ontfenck die lengde der duysternisse dwynge een eynde nam Och god des bystu lauesam 15 Die dinre soe lange gebeydet
[pagina 262]
hadden quamestu soe sachte der vrouden sullen wy becrachten ende wesen des wys dat gades soen gebaren is 16 Ghi ewangelisten alle vier gi moget daer wal op crachten dat gy wyselicke wachten dat sackelkyn dat v bracht een Jonfer fyn 17 Matheus siet du op den giet op in gades namen ende leert ons alte samen du biste geleert hoe gades soen mensche waert 18 Lucas ryt den sack ontwee
[pagina 263]
giet op die moelen laet wryuen du kanste ons wal bescryuen dat offer groet hoe gades soen leet den doet 19 Marcus sterke lewe fijn giet op die moelen laet scraden hoe god opstont vanden dode hoe dat gescach dat riepestu aenden Jersten nacht 20 Johannes een aern van hoger vlucht du kanste ons wal geleren die hemeluaert ons heren al apenbaer help ons dat wy comen daer 21 Die moelen goet se is bereyt die nv soe willen maelen die
[pagina 264]
sullen daer wal haelen syn coernken reyn soe wordet hem ghemaelen cleyn 22 Pawes keyser predicker waert ghi die moelen euen dat sy moghe geuen mele ende molt daer van soe wort v ryke stolt 23 Die syne ziele spysen wyl die sal sich hier nae snellen tot deser moelen vellen hi is des wys sy malet ende molftert niet 24 Die dese moelen gebouwet heeft den moet god geleyden
[pagina 265]
wanneer hi van hier sal scheyden in engels wijs soe voer hem god in dat paradys Amen

Vorige Volgende

Over dit hoofdstuk/artikel

lied

Naar de Nederlandse Liederenbank