Handschrift Berlijn mgo 185 (15de eeuw)

Handschrift Berlijn mgo 185

(15de eeuw)–Anoniem Handschrift Berlijn mgo 185– rechtenstatus

Auteursrechtvrij

Vorige Volgende


[lied 70]
dit is die wyse volnae als die dach der vrolicheit 1 DOe god onse here gebaren waert toe betlahem in die stede ende doe verrees al mitter vaert een
[pagina 236]
schoene steerne daer mede drie Conyngen worden des ontwaer dat die steerne schene oec al soe claer sy seyden al gelicke den Joden is een conynck gebaren onsen bede en is oec niet verlaren wy soeken oen int Joedesche ryke 2 Die Conyngen scheyden doe van daer sy en wolden niet langer beyden die steerne die scheen daer voer hem claer sy solde sy den rechten wech leyden die steerne was scoenre dan die dach sy hielt altoes den rechten pat hoer ganck was byder eerden oer wege die waren alsoe mennichuolt mer god die hadde der steernen
[pagina 237]
gewolt ten eynde dat sy oer keerden 3 Toe Jherusalem quamen sy Jerstwerf aen die steerne bleef verlaren sy vrageden weet daer yemant van een Conynck is daer gebaren een teyken is van hem gesien soe voer al in dat oestenryke wi en connen des oec niet ontgaen Ga naar voetnoot+ wi syn hier comen ende beden hem aen wi drie al gelike 4 Doe herodes dat vernam syn anxt en was niet cleyne hi waert in synen synne oec alsoe gram ende alle die stat daer mede hi liet haelen die hoechste priesteren ende daertoe
[pagina 238]
oec die wyste meysteren sy waren wtuercaren gi heren een dynck heb ic gehoert condy my des yet maken vroet waer dit kynt is gebaeren 5 Sy segden alle dat is waer toe betlahem Ist gebaeren dat sprack al den prophete claer soe mennich Jaer te voeren doe herodes dat hadde vernaemen die conyngen dede hi voer hem comen hi vraegde hem heymelike gi heren condi wal verstaen waer saegdy syne steerne opgaen wt uwes conynges ryke 6 Die Conyngen en dachten daer in geen quaet sy seydent hem apenbare herodes sprack
[pagina 239]
ic geue v raet toe betlahem suldi varen ic segge v dat altoe voerwaer dat kynt dat suldi vynden al daer dat heb ick wal vernaemen als gi weet waer dat kyndekyn is soe maket my des kyndes wys als gi wedercoemen 7 Soe wil ic coemen als ic Jerst kan ende wil hem doen groet ere dat kynt dat wil ic beden aen voer enen landes heren die Conyngen scheyden doe van daer die steerne die scheen daer voer hem claer sy solde sy rechte leyden die steerne die solde doe voer hem gaen al totter stat daer sy bleef staen daer maria ende hoer kynt in waren 8 Die Conyngen traden in dat huys
[pagina 240]
daer toe en was hem niet leyde sy vonden dat kyndekyn schoen edel ende claer maria ende Josep daer mede sy vielen neder op hoeren knyen sy baden dat kyndekyn aen alle drie mit rechten oetmoedigen synnen sy loeken op hoer scatten soe bolde sy offerden merre wieroec ende golt mit hertelicker mynnen 9 God die vader dedet hem apenbaer des nachtes in oren droemen sy solden van herodes varen niet weder tot hem comen sy waren des soe wal getroest ende waren van herodes verloest dat quam hem al gelicke sy waren des soe wal gemoet sy voeren enen anderen wech soe guet tot ores Conynges ryke Amen	voetnoot+ na ontgane: woord doorgehaald: 'gaengen' ?

Vorige Volgende

Over dit hoofdstuk/artikel

lied

Naar de Nederlandse Liederenbank