Handschrift Berlijn mgo 185 (15de eeuw)

Handschrift Berlijn mgo 185

(15de eeuw)–Anoniem Handschrift Berlijn mgo 185– rechtenstatus

Auteursrechtvrij

Vorige Volgende


[lied 69] 1 Wyldy hoeren syngen enen sueten sanck van Jhesus die ic geerne sage al wordet lanck ende hoe hi inder jerster nacht in eenre crybben wart gelecht al onverborgen die een reyne hertken heeft die en ders niet sorgen 2 Ende doe heer Jhesus gebaren wart doe wasset colt in tween olden hasen
[pagina 230]
geuonden waert daer stont een esel ende een ront die hueden maria oer lieue kynt ende onsen heren die hem soe wal gedienen kan hi lones hem sere 3 Jhesus wart besneden nader older ewe woldes v niet verdrieten ic songes v meer dat worden die hilige drie Conynge ontwaer sy brachten oren offer daer ende oren gauen sy baden dat weerde kyndekyn om syne genade 4 Josep doe den esel nam al by den toem wat vant hi anden wege staen een dattelen boem och eselken du moetste stylle staen wi willen die dattelen plucken gaen
[pagina 231]
wi syn seer moede die dattelen boem ter eerden nech in marien stote 5 Maria las die dattelen in oren schoet Josep was een olt man dats hem verdroet Maria laet die dattelen staen wy hebben noch viertich mylen te gaen het wort seer spade wy bidden dat weerde kyndekyn doer syne genade 6 Josep nam dat eselkyn al byder hant sy quamen by schoenre sonnen in dat eyepten lant eyepten is een seer guede stat daer Josep oec die herberge bat seer ellendich maria die span voel guedes gaerns mit oren handen
[pagina 232]
7 Maria die conde spynnen dat vrouwelyn Josep die conde tymmeren sy geneerden sich doe Josep niet meer tymmeren en kan doe was hi alsoe olden man hy haspelde geerne Jhesus droech dat gaernken te huys den ryken ende den armen 8 Den hiligen geest den hadden wi geern al beyden wy lanck wy willen noch van heer Jhesus syngen enen nyen sanck hoe lieue dat synre moeder was doe hy in oren armen lach al onverborgen soe wie heer Jhesus mynne draget die en derf niet sorgen 9 Doe Jhesus inder crybben lach
[pagina 233]
dat hilige kynt drie hilige Conyngen tot hem quamen wt oryenten sy offerden daer drie gauen stolt merre wieroec ende golt sy waren reyne dat kynt dat is der engelen heer der werlt gemeyne 10 Doe herodes dat vernam die felle tyran dat dat kynt gebaeren was hi waert seer gram hi synen knechten doe geboet dat sy brachten die kynder ter doet soe wredelike daerom soe syn sy nv gecroent int hemelryke 11 Die engel inder mydder nacht
[pagina 234]
tot Josep quam Josep vrent staet op gereet scaffet v vandan herodes heeft der kynder voel gedodet het gaet der nv al wt den spoel om Jhesus wille Josep voer toe eyepten wert in eenre styllen 12 Doe Jhesus anden cruce clam die hilige man ende maria syn lieue lieue moeder tot hem quam hoer herte dat was in groter noet hi leet voer ons den bitteren doet soe mynnentlike dat sullen wy in ons hertken dragen stedelicken 13 Jhesus is die beste weert dat weet ic wal daer hi aender tafelen syt daer vaertmen wal hi is die weert ende hi salt oec syn hi quyt die cost hi betaelt den wyn dat
[pagina 235]
doet hi geerne ic waer soe geerne nae deser tyt in syne tauerne 14 Soe wille wy dan heer Jhesus bidden om ene bede dat hi ons geue nae deser tyt synen ewigen vrede ende daer toe oec syn suete aenschyn ende mitten engelen blyde te syn eweliken wie Jhesus in sinen herten draget den maket hi ryke Amen

Vorige Volgende

Over dit hoofdstuk/artikel

lied

Naar de Nederlandse Liederenbank