Handschrift Berlijn mgo 185

[lied 67]

vander hoechtyt van kersdach

1   Alleluya God gruet v edel maegdekyn
gebenedyt soe moety syn
al opten dach

[p. 223]

 

van huden

 

gy hebt gebaert een kyndekyn

 

al sonder wee ende sonder pyn

 

dat edel is van liden

 

 

 

2   Alleluya heer Jhesus lach int crybbekyn

 

men sach syn naecte rybbekyn

 

syn decsel was seer dunne

 

van colden soe weenden dat kyndekyn

 

doe sprack maria die moeder syn

 

nv swyget myn lieue mynne

 

 

 

3   Alleluya een os ende oec een eselkyn

 

ververmden dat kynt die lede syn

 

die ander crybben stonden

 

het was seer colt int huselkyn

 

aldaer en was roc noch hemdekyn

 

hi lach int hoy gevonden

[p. 224]

 

 

 

4   Alleluya die hierden inden velde lagen

 

grote claerheit dat sy daer sagen

 

sy waren al in varen

 

Een hilich engel quam tot hem

 

ende segde gaet toe betlahem

 

daer is gades soen gebaren

 

 

 

5   Alleluya gi hierden en weest nv niet verveert

 

gaet haestelic toe betlahem wert

 

daer is een kynt gebaren

 

van eenre reynre maget fyn

 

hi sal onser alre verloeser syn

 

hy is daer toe vercaren

 

 

 

6   Alleluya die ⁺ hierden gengen alte samen

 

soe lange dat sy toe bethlahem quamen

 

daer sy die maget vonden

 

sy songen vrolic sy dreuen jolyt

 

sy aenbe

+ 'die' is boven het doorgehaalde woord 'ghi' geschreven.

[p. 225]

 

den dat kynt ter seluer tyt

 

sy sagen daer aen groet wonder

 

 

 

7   Alleluya die Conyngen quamen aldaer van veer

 

geleyt by eenre nyer steernen

 

sy brachten hoer offerhande

 

als merre wieroec ende golt

 

sy gauent den kynde in syn beholt

 

sy togen weder om toe lande

 

 

 

8   Alleluya doe Conync herodes dat vernam

 

waert hi soe toernich ende gram

 

hi dachte in quaden saken

 

daer mennyge moeder scade by nam

 

ende alsoe mennich onnosel lam

 

syn leuen daer om moste laten

 

 

 

9   Alleluya maria nam oer kyndekyn Josep te volgen

 

myt

[p. 226]

 

groter pyn sy togen in groter sorgen

 

al in eyepten sy bleuen daer

 

tot dat die engel hem brachte die maer

 

dat herodes was gestoruen

 

 

 

10   Alleluya doe toegen sy weder toe lande wert

 

als hem die engel hadde apenbaert

 

Int lant van galileen

 

daer woenden Jhesus mit synre moeder

 

Ende Josep hoeren trouwen behueder

 

een lange tyt in vreden

 

 

 

11   Alleluya nv laet ons allen mit herten reyn

 

anbeden dat suete kyndekyn cleyn

 

ende syn lieue moeder mede

 

dat hi nae deser corter tyt ons wil geuen

 

syn hemelryke ende synen ewighen vrede

 

Amen