Handschrift Berlijn mgo 185 (15de eeuw)

Handschrift Berlijn mgo 185

(15de eeuw)–Anoniem Handschrift Berlijn mgo 185– rechtenstatus

Auteursrechtvrij

Vorige Volgende


[lied 50]
Dyt is die wyse hier voer en coer ic syluer noch golt noch peerlen fyn noch ander etcetera 1 Ic ghenck in ene dagheraert vroe eer die lichte dach opgenc spaecieren inden wolde ic sach daer comen holden spraeck ende hadden herden wysen raet dre edele scoene vrouwen 2 Ick sach die ene mit rouwen beuaen sie weende soe menygen bitteren
[pagina 173]
traen wt mynnentliken herten Ick sach sie gaen ic sach sie staen sie en wolden van nyement troest ontfaen van rouweliker smerten 3 Sie sprac mit enen drouigen syn waer mach hi wesen dien ic myn dien ic hadde wtuercoeren Die derde dach die gaet nu in dat ic van hem gescheiden bin die my vergaf myn sunden 4 Bi hem soe plach ic gheern toe sin want hi dat drouige herte myn dickwile plach toe verbliden sin vrentlicheit sin suete aenschyn verdriuet wt mi al druck ende pin nv is myn herte vol lydens 5 Recht als ene druue die woert geparst daer men den edelen wyn wt parst soe is myn herte verclommen om dat hi maect soe lange varst verdroecht myne cracht recht als een harst die daer hanget inder sonnen
[pagina 174]
6 Als ene moeder hoer enyge kint dar sie mit ganser herten mynt hade ic hem wtuercoeren ende mit herten soe ghemynt want men sin ghelic niet en vint soe edelick gheboeren 7 Die enghel sprac mit sueter reden wie suecstu wyf ende weenste dus seer waer om screydi soe seer Ic mach wal seer tonvreden sin want ick en weet toe ghenen steden toe vynden mynen heren 8 Sonder vertreck nv comet ende besiet waer hi was ghelecht ende twiuelt niet den heren van hemelrike sie sach int graf sie en vandes niet sie kierde hoer omme al mit verdriet sie weende bitterlike 9 Als sie dus stont ende weende seer soe sach sie hem inden omme kier in eens gaerdenars gelike sie sprac tot hem mit groeter gheer weet
[pagina 175]
ghi yet van mynen heer dat doet mi doch ontbliken 10 Weet ghi oec van hem oeck enych bescheit soe segt mi waer hi is gelecht ic wil hem wederhaelen hi is verresen inder waerheit nu hoert als hoer die enghel secht mit alsoe sueter taelen 11 Laet af din trueren schone wyf hoe moegdi v ionge fyre lyf in rouwen aldus verteeren wie suecti myt dus groete verdriet ghi screiet dus seer ende harde styf ende wat is din begeerte 12 Och konde ic vynden den meyster myn daer ic om lyde soe groete pyn wt herteliker mynnen ic solde soe wal toe vreden sin ende saluen mitten balsem fyn ende brengen hem weder bynnen 13 Maria sprac doe ihesus tot hoer hoe moege gi dryuen aldus mysbeer ende moeget dus drouich wesen gaet ende
[pagina 176]
segghet mynen broders openbaer ende petrus al voerwaer soe dat ic bin verresen 14 Als sie vernam dat suete woert dat sie di soe dicke hadde gehoert viel sie ter stont ter eerden sie boet toe cussen rechte voert sin edele voete alst wal behoert mit alsoe groeter weerden 15 Och rabbi sprac sie meyster myn ic solde soe geerne die voete din cussen sonder spaeren Neen maria dat en mach niet sin want ic en bin noch niet geuaeren tot mynen hemelschen vader 16 In corter tyt ende alte hant die apostelen sie vergaedert vant mit also groeter weerden nv doet die droefheit vander hant ic sal v vroude doen bekant onse heer is verresen 17 Een yeghelic man was daer ver
[pagina 177]
blydet dat ihesus christus ghebenedyt waer vander doet verresen Nu gunne ons god nae deser tyt dat wi mit hem in hemelrick ewelic moeten leuen An

Vorige Volgende

Over dit hoofdstuk/artikel

lied

Naar de Nederlandse Liederenbank