Handschrift Berlijn mgo 185
(15de eeuw)–Anoniem Handschrift Berlijn mgo 185–
Auteursrechtvrij
[pagina 144]
| |
dit is die wyse Myt vrouden wille wy syngen scoen boelken byder hant van drien1 Myt vrouden wylle wy syngen
ende lauen drieuoldicheit
dat sy ons willen brengen
ter hoochster salicheit
die ewelic sal dueren
och ewelic sonder verganc
och mocht ons dat geboeren
och ewelic is soe lanck
2 Och leuede wy nae tgheloeue
mer als wy leuen solden
ende dienden altyt gade
ende onser lieuer vrouwen
als wy die sonden laten
sy wetent ons groten danck
sy dancken ons bauen maten
| |
[pagina 145]
| |
och ewelic is soe lanck
3 Die blyscap sonder eynde
hier bauen in hemelryke
die wi daer sullen vynden
sy en geuet ons geen gelic
dat is dat godtelike wesen
het schencket ons blyden dranck
als ic heb hoeren lesen
och ewelic is soe lanck
4 Maria die moeder gades
sy is van ons verblyt
als wi ons bekeren
in deser armer tyt
maria maget reyne
schoen suuer wyngartsranck
bidt voer ons gemeyne
och ewelic is soe lanck
5 Die hiligen alle gader
sy dryuensoe groten feest
| |
[pagina 146]
| |
sy lauen god den vader
den soen den hiligen geest
als wi die sonden laten
sy wetens ons groten danck
sy dancken ons bauen maten
och ewelic is soe lanck
6 Die enghelen mennychuoldich
sy maken ons blyde seer
des laet ons syn verduldich
dat gelt ons euen duer
doe moegen wy vercrygen
der sueter enghelen sanc
nv ende tot allen tyden
och ewelic is soe lanck
7 Nv laet ons dienen gade
dat rade ic jonck ende olt
ende holden syne gebade
ende dancken hem mennichuolt
dat hi ons wil beschermen
al voerder hellen stanc
endevoer dat ewelicke carmen
| |
[pagina 147]
| |
och ewelic is soe lanck
Amen
|
|