Handschrift Berlijn mgo 185

[lied 30]

1   God vanden hemel die aenden cruce leet
ende maria die reyne fonteyne
die en wil ons vergeten ommer niet
sy bewaer ons geselscap groet ende cleyn

2   Tot onsen heren god wille wi all ⁺gader varen

+ Waarschijnlijk is na ‘all een ‘e’ weggevallen, doordat het blad afgesneden is.

[p. 100]

 

nv hoert wat ic v sal verclaren

 

nv hoert myne reden auerluyt

 

van eenre joncfrouwen geheten Sante gheertruyt

 

 

 

3   Ende van enen stolten rydder medesunt

 

nv moegdy hoeren wat hi dede

 

hi mynden syn lief op alsoe gueder trouwen

 

Sante Gheertruyt die schone joncfrouwe

 

 

 

4   Al daer sy oer in een cloester hadde begeuen

 

daer wolde si dienen al oer leuen

 

god ende den groten heren Sante johan

 

den hadde sy vercaeren tot enen man

 

 

 

5   Die rydder alle dage dat hi tot oer quam

 

als hi sy niet ende moch te sien of spreken

[p. 101]

 

druck ende liden soe ghynck den rydder aen

 

hem dochte syn herte solde hem toe breken

 

 

 

6   Alsoe lief hadde hi die schoene joncfrouwe

 

dat hi oer wal gan syne trouwe

 

hi dachte hi soldet oer seker vragen

 

mer hi en dorste des nye gewagen

 

 

 

7   Ende alsoe lief hadde sy den rydder weder

 

ende al in gueder reynicht

 

Sante johan en wolde sy niet beswyken

 

noch maria gades moeder mede

 

 

 

8   Nv wil ic laten dese reden

 

ende vanden rydder wil ic v syngen

 

wat costen dat hi daer toe dede

 

des en konde hi niet volbrengen

 

 

 

9   Hi liet oer maken voele schoene dingen

[p. 102]

 

hoe luttel dat hi oer dat vrageden

 

kerken en clucen hi dede daer mysse in syngen

 

allent dat hi woste dat oer behagede

 

 

 

10   Drie jaer lanck heeft die rydder dit geplegen

 

des soe en heeft hi niet beholden

 

syn scat ende syn guet heeft hem altemael begeuen

 

des hadde die rydder alsoe groten rouwe

 

 

 

11   Addev guet lief ende blyft gesont

 

addeu ende ic moet ommer van v scheyden

 

die wech en is my niet becant

 

toe dwaelen aen geenre wylder heyden

 

 

 

12   Och lacy god het is altemael verlaren

 

wat coste dat ic daer aen hebbe gelecht

 

had ik dat soe wal geweten toe voeren

[p. 103]

 

ick wolde vander joncfrouwen hebben gescheyden

 

 

 

13   Dus is die rydder wtghestreken

 

in eenre duyster auentstont

 

hi is gaen dwaelen aen geenre wylder heyden

 

dye wech die was hem onbecant

 

 

 

14   Doe dat quam omtrent der myddernacht

 

druck ende lyden soe gynck den rydder aen

 

die viant die hadde hem alsoe schier verwracht

 

hi stont gescaepen of dat waer een man

 

 

 

15   Die viant die sprack den rydder toe

 

vrent hoe coemdi in dit liden

 

ic weet v herte oec alsoe wal van bynnen

 

wanneer gi wylt soe sal ic v verblyden

[p. 104]

 

 

 

16   Die rydder die sprack den viant weder toe

 

van v soe en byn ic niet verblyt

 

ic en wil noch jerstwerf weten

 

wan gi comt of wie gi syt

 

 

 

17   Die viant die sprack een guet beduyt

 

wat helpet dat ic v voele vertelle

 

och lieue vrent versaget v ommer niet

 

ic byn die viant vander hellen

 

 

 

18   Ick ende alle myne gesellen

 

wi willen v geuen guedes alsoe voele

 

nvmmermeer en moegdi dat verteren

 

^{v +} vrende ende v mage sullens hebben te bet

 

 

 

19   Ic en alle myne gesellen

 

wy willen v geuen guedes alsoe voele

+ Hier is ‘v’ later boven het vers toegevoegd.

[p. 105]

 

nv settet my v ziele tot enen pande

 

ende segt my hoe lange dat gi leuen wylt

 

 

 

20   Soeuen jaer soe coes die rydder syn leuen

 

hi leet daer wt syn rode bloet

 

daer en was penne noch fransyn

 

hoe schier dattet daer gescreuen stont

 

 

 

21   Hy hadde syn segel daer aen gedrucket

 

hi gaf den viant synen brief

 

hoe luttel dat hem daer voer gruwelden

 

soe seer mynde hi syn suetelief

 

 

 

22   Die rydder reet hen soe blydelic

 

in hem seluen dat hi loech

 

die viant en woldes niet beswyken

 

hi bracht hem scattes ende guedes genoech

[p. 106]

 

 

 

23   Eten ende dryncken ende alle syn genoechte

 

ende in ternoeye wolde hi steken

 

want hi hadde guedes alsoe voel

 

nvmmermeer en mochtes hem ontbreken

 

 

 

24   Soeuen jaer is nv syn leuen

 

luttel myn of luttel bet

 

soe sprack die viant tot deser vren

 

comet weder op deser seluer stat

 

 

 

25   Wanneer die souen jaer syn omgecomen

 

stolt rydder gi en sult des laten niet

 

gy sult hier comen op deser selue stede

 

v is hier alsoe lede gheschiet

 

 

 

26   Ende doet quam in dat souende jaer

[p. 107]

 

ende doet quam anden lesten dach

 

doe stont die rydder ende dachte

 

wat dat hi eens gelaeuet hadde

 

 

 

27   Doet quam in die leste maent

 

hi heeft hem seluen alsoe wal bedacht

 

wat hi synre armer zielen hadde mysdaen

 

daer hem die viant in crencken mochte

 

 

 

28   Addeu sante Gheertruyt wy moeten ommer scheyden

 

sy sprac ons lieue vrouwe die moet v geleyden

 

by v te blyuen en is my gene bate

 

addeu Sante gheertruyt ic moet v laten

 

 

 

29   Nv dryncket rydder sante johans geleyde

[p. 108]

 

nv dryncket om die mynne van my

 

nv dryncket rydder het sal v vroemen

 

ic hape gi sult wal weder coemen

 

 

 

30   Hy nam den nap op synre hant

 

hi setten hem voer synen mont

 

hi en hadde die wyn oec niet gespaert

 

hi dranck hem wt al toe den gront

 

 

 

31   Dus heeft hi oerlof vander joncfrouwen genaemen

 

ende hy gynck dwaelen aen gheenre heyden

 

daer hi gelaten hadde syne trouwe

 

ende daer toe oec syne sekerheit

 

 

 

32   Hy weenden syn peert hi stacket mit spaeren

 

hi liet dat gelidendoer dat sant

[p. 109]

 

hi dachte dat waer doch altemael verlaeren

 

hi quam daer hi den viant vant

 

 

 

33   Wat doedi hier wal loese scherjant

 

van v soe en byn ick niet verblyt

 

holt daer uwen brief in uwer hant

 

gaet van my ic schelde v quyt

 

 

 

34   Sy sittet hier achter op v peert

 

die v alre lestwerf dryncken gaf

 

van hoer soe byn ick alsoe seer verweert

 

sy heuet mi benamen alle myne macht

 

 

 

35   Nv rade ic allen heren ende knechten

 

syn sy arm of syn sy ryke

 

sy dryncken sante geertruden mynne

 

waer dat si gaen of waer sy syn