Handschrift Berlijn mgo 185

[lied 9]

dit is die wyse Ic sie die mergen steerne myns lieues claer

1   Maria Conyngynne
myn troest myn toeuerlaet
vercryghet

[p. 27]

 

my uwes kyndes mynne

 

ende berouwe voer myne mysdaet

 

 

 

2   Soe wie yet sal begynnen

 

tot syn lof ende eer

 

staet hi niet inder mynnen

 

het sal hem verdrieten seer

 

 

 

3   Och had ic my begeuen

 

doe ic olt was x jaer

 

in enen gheestelicken leuen

 

ic waer syne mynne voel naere

 

 

 

4   Nv mach ic wal clagen

 

ende bewenen myne mysdaet

 

dat ic aldus voel dagen

 

verlaeren heb myn tyt

 

 

 

5   Nv troest my keyserynne

 

maria maget reyne

 

sterket my mit uwes kyndes mynne

 

ende droefheit van my verjaget

 

 

 

6   O mensche swyget van bynnen

 

swyget stylle ende hoert my aen

[p. 28]

 

ende scarpet uwe synne

 

soe moogdy my verstaen

 

 

 

7   V clagen ende v begeren

 

dat heb ic wal gehoert

 

anxt ende droefheit v bekeren

 

daer gi wel mynne voer toent

 

 

 

8   Ick sal v mynne verweruen

 

van Jhesus mynen soen

 

draget in v herte lieuer te steruen

 

dan tegen hem te doen

 

 

 

9   Och wie sal my verlenen

 

alsoe int herte te staen

 

och hoe sal ic verdienen

 

guede synnen te ontfaen

 

 

 

10   Och mensche waer syn v synnen

 

hoe dwaeldy aldus seer

 

wilt doch in v dit bekennen

 

het heeft verdient v here

 

 

 

11   Ghy en cont dat niet begeren

 

ist salich tsal v geschien

 

mer trouwen soldet v deren

 

ten schiet v een noch en geen

[p. 29]

 

 

 

12   Waerom soe wildi trueren

 

ende v verslaen dus seer

 

hadde god v niet vercaeren

 

gi en waert hier nvmmermeer

 

 

 

13   Ghy moet wal in v herte

 

trueren voer v mysdaet

 

mer dencket dat myn steruen

 

voel daer bauen gaet

 

 

 

14   Lof ende eer sy v maria

 

schoen edelle suuer maget

 

wie hem tot v wyl keren

 

die en wort oec niet versaget