Handschrift Berlijn mgo 185
(15de eeuw)–Anoniem Handschrift Berlijn mgo 185–
Auteursrechtvrij
[pagina 22]
| |
ons dat volbrengen
Maria is die ic meyne
van gade is sy wtuercaren
in hoer soe wolde hy rusten
hi wart van hoer gebaren
in hoer soe wolde hi rusten
hi wart van oer gebaren
2 Ick en kan sy niet volprysen
noch lauen in geenre tyt
sy gaet alle joncfrouwen bauen
in hemel ende in eertryke
Ick gruete di O edel joncfrouwe fyn
bauen alle die gene die leuen
sydi inder herten myn
et bauen al die gene etcetera
3 Myt recht mach ic di lauen
du edelle peerle fyn
voel blenckender dan die sternen
claere dander sonnen schyn
sy is die lichte dageraet
mit hoeren claren aenschyn
voer allen joncfrouwen wil ic se lauen
Want sy hem allen bauen gaet
voer allen joncfrouwen etcetera
| |
[pagina 23]
| |
4 Onder allen creatueren
en vyndic hoers gelic en geen
hoer ogekyns lichten claere
dan die carbunkel steen
sy is dat clare mergenroet
altoes wil ic sy eren
gestedelick totter doet
et altoes wil ic sy etcetera
5 Tot hoer wil ic my keren
ende nvmmermeer aflaen
sy licht mi inder herten
maria walgedaen
al myn hape set ic in hoer
Och mocht ic se scouwen
geen dynck en coer ic daer voer
etcetera och mocht
6 Maria schone joncfrouwe
du edelle peerle fyn
wilt my genaede verueruen
van al die sunden myn
gy syt daer alle myn troest aen steet
tot uwen steden dienst
wil ic altyt syn bereyt
et tot uw
7 Och wtuercaren bloeme
du edel roesken roet
wilt mi toe troes Ga naar voetnoot+
| |
[pagina 24]
| |
coemen
totten lesten in mynre doet
gyf my een salich steruen
wilt my genade verweruen
als ic scheyden sal van eertryke
etcetera gyf my een salich steruen
wilt my genade verweruen
als ic scheyden sal van eertryke
Amen
|
|