Handschrift Berlijn mgo 185

[p. 13]

[lied 4]

dit is die wyse O venus bant O vuerich

1   O Jhesus bant O vuerich brant
hoe heeft v mynne in my bewant
myn hertken onbedwongen
dat doet v troestelic onderstant
wat lof wort v int hemelsche lant
gesongen
al mitter engelscher tongen

2   O maget reyn o hemels screyn
gy syt ons hape ons troest alleyn
stady ons nv in staden
gy syt den sunderen int gemeyn
ende een vol vat dat der is sarteyn
geladen
mit godtelicker genaden

3   O reyne maget daert licht wt daget
v groet oetmoet heeft god behaget
ende daer toe wtuercaren

[p. 14]

 

die jerste sunde heeft hi beclaget

 

ende waert van v jae onuersaget

 

gebaren

 

hi ontsloet datter was verlaren

 

 

 

4   O rosegart van god bewaert

 

v gracie is geapenbaert

 

in ons tot mengen stonden

 

mer als die ziele ter pynen uaert

 

biddi daer voer sy wort gespaert

 

van sunden

 

des wil ic vry orconden

 

 

 

5   O lieue here lof danck ende eer

 

scryue ic tot v

 

mit groter begeerten wt mynnen

 

ic byn gewont here herde seer

 

mit groten sunden buten keer

 

van bynnen

 

sent troest of wy ontsynnen

 

 

 

6   Die viant fel hi is altyt sneel

 

wy syn verloest dat weet hi wel

 

daer om lecht hi ons lagen

 

hi smyt hi cloppet hi maket rebel

 

op dat hi ons mach in die helle

 

beknaghen

[p. 15]

 

ist vremde dat wy versaghen

 

 

 

7   Hier om ist noet cleyn ende groet

 

mer dat wy dencken opten doet

 

ende leren altyt steruen

 

ten baet weer hals noch edel bloet

 

veer huys noch hof noch enich guet

 

of erue

 

wy moeten dan al steruen

 

 

 

8   Waer op segt my verlaety di

 

geen scepen brieue wer olt noch nye

 

sy en moegen v dan niet baten

 

daer om siet voer dat seg ic vry

 

v lyf ende v guet mer als een pry

 

te haten

 

gy moetet al hier laten

 

 

 

9   Dit ist slot van al dat god beual

 

dient my oetmoedich sonder gal

 

staet vast in uwen stryden

 

holt niet ant gras ende laet den val

 

mer doedy dat soe sy dy mael

 

int liden

 

stat vast in uwen stryden

[p. 16]

 

 

 

10   Hebt lief verstaen die v versmaen

 

recht als francyscus heeft gedaen

 

hi is daer by verheuen

 

Soe moegdi mit hem sonder vaen

 

dat blyde woert van god ontfaen

 

bescreuen

 

comt hier int ewige leuen

 

Amen