Handschrift Berlijn mgo 185
(15de eeuw)–Anoniem Handschrift Berlijn mgo 185–
Auteursrechtvrijdit is die wyse lief hauen ende myden | |
[pagina 10]
| |
1 Ic wyl my seluen troesten
ende maken enen moet
al byn ic nv int liden
dat sal noch werden guet
alst liden is vergangen
soe comet die blyscap aen
in liden wil ic my holden
als ic beste kan
2 Natuerken du moetste dich liden
dins herten ongeuoech
ic byn hier inden liden
my is dicke soe wee toe moede
Och god soe wilt my troesten
alst v doncket wesen tyt
al voer des viandes stricken
syn lagen synt soe wyt
3 Nochtans soe wil ic hapen
ende trueren niet soe seer
myn liden mach verwandelen
genaede geeft die here
dat my is geuallen
dat mach een ander geschien
conde ic myn liden verhaelen
soe wolde ic trueren niet
| |
[pagina 11]
| |
4 Och rat van auentuere
woltstu niet ommeslaen
die my wolde helpen trueren
dat duchte my wal gedaen
het comet in eenre vren
men kans gewenden niet
wat solle wy voel betrueren
oec als men dagelix siet
5 Eens woerdes mach ic gedencken
dat ic toe seggen plach
my seluen wil ic schenken
dien heren diet al vermach
my seluen wil ic schencken
soe mach ic werden quyt
ende dienen hem al myn leuen
den heren van hemelrike
6 Myt liden machmen temmen
ende bendich maken schier
een hertken sonder liden
is een onstaedich dier
daer by soe machmen merken
ende hoeren oren sanck
van liden waer voel te spreken
die reden worden voel te lanck
| |
[pagina 12]
| |
7 Hier by soe machmen merken
hoe mennich edel hertken steet
dat syn natuer moet crencken
ende smedet daer op dat golt
dat sprutet aender heyden
die bloemkens jonck ende olt
ic ligge hier arm geuangen
van liden werde ic olt
8 Och older mach ic weerden
ende jonger nvmmermeer
solde ic dit langer herden
soe wolde ick bidden seer
doer god ende doer genaede
dat hi myns gedachtich weer
die rouwe comt voel toe spade
dat ordel is geschiet
9 Och heer van hemelryke
ontfermt my arme mensche
ic ligge hier ellendelike
Siet my ellendich aen
ende wyldet my vergeuen
al doer marien eer
ic diene v alle myn leuen
ic en hoene v nvmmermeer
Amen
|
|