Een hantboecxken inhoudende den heelen Psalter des H. propheete Dauid



[Folio 1r]
Corte Commarien op elcken Psalm gemaect, van hetghene dat hy in houdende is, waer af dat hier nae volcht het inhouden vanden eersten Psalm.
Dit is eene vermaninghe, als dat wy ons aen Godts woort houden, ende voor valsche leeringhe ons wachten souden, alsdan soo wilt ons Godt geluck en salicheyt tot allen ons doen, ende laten gheuen.
Psalm. I. Beatus vir qui non abijt. Op de wijse. Wo Got der Herr nicht. Oft op den C XXIIII. Psalm. Oft op den naeuolghenden thoon. Salich is hy, die en wandelt niet Inden Godtloosen rade: Noch op den wech der sondaren treedt, Noch sidt by Spotters quade:
[Folio 1v]
Maer die heeft synen lust ghemeen, In Godt des Heeren Wet alleen, Daeraf spreeckt dach, en nachte. Die sal zijn als eenen boom gheplant, By goede water Beken, Die zijn vrucht gheeft Tsoemers playsant, Wiens bladers niet en verflecken: Wat hy beghint, sal gheluckich zijn, Daer de Godtloosen, wech stuyuen sijn, Ghelijck het Kaf vanden winde. Die Godtloosen, in het oordeel, En sullen niet staende blyuen: Die sondaers, vanden rechtueerdghen gheel, Salmen al sien verdrijuen: Want Godt der rechtuaerdghen wech kent, Maer des Godtloosen, padt gheschent, Sal doer de cracht Godts worden. Eer sy den Vader, en den Soon, En oock den Heylighen Geeste: Die int beghin was, en nu schoon,
[Folio 2r]
Ons zijn ghenade leeste: Dat wy wandelen in zijnen paedt, Dat ons de sundt, die siel niet schaedt, Wie dat begheert, die spreeck, Amen.

Corte Commarien op elcken Psalm gemaect, van hetghene dat hy in houdende is, waer af dat hier nae volcht het inhouden vanden eersten Psalm.