Sondag-liet;
Stem: Vande Boter pacht
Den Sondagh is wel nae mijn sin,
Hy komt soo ghemackelijck in,
Ick slaep met rust, Zoo langh ’t my lust,
Ick wou dat altijdt Sondagh waer.
Sondaeghs staet alle hant-werck stil,
Dat gaet soo fraey al naer ons wil:
Elc tot zijn vrient, Gaet waer ’t hem dient,
De een tot d’aer, Ick wou, &c.
Het wercken is een groot verdriet,
Voor hem die geeren en werckt niet,
’t Is hem een plaech, Oock alle daegh,
En alle het Iaer, Hy wou, &c.
Sondaeghs gaen oock de visschers uyt
Met Emmer, Korf al om de buyt,
Om vangen met: Schaeckel Werp-net,
Den Henghelaer, Hy wou, &c.
De Vroukens tooghen dan haer vlijt,
Om Sondaeghs te wesen verblijt,
Elck in zijn Huys, Of by zijn Buys
Of zijn Minnaer, Ick wou, &c.
De Knechten zijn dan oock bereyt,
Om te gaen al met de Meyt,
Gins ende weer, Naer haer begheer,
In ’t groen eenpaer, Ick wou, &c.
| |
Van Haerlem naer die Zandtpoort,
Naer Velsen, Schoten gaetmen voort,
Naer Beverwijck, Sonder beswijck,
Gheen sant-wech swaer, Ick wou, &c.
Naer Wijck op see is dan den ganck
Seer lieffelijck oock langhs het stranck
Tot Zantvoort vermelt, En na Bentvelt
T’Overveen daer, Ick wou, &c.
Aelverts-bergh, Blommendael al ree,
’t Stuyf-sandt en ’t Huys te Brero mee,
De Kruyt-berg koen, Met kruyden groen
Elck soeckt zijn paer, Ick wou, &c.
Naer Spaerendam ist principael,
Aldermeest om den Pan-ael,
Elck met zijn min // Of zijn ghesin
Reyst hy door ’t Spaer, Ick wou, &c.
Sparwou Pennincxveer Rustenburg,
Gaetmen lieffelijck sonder surgh
Elck met zijn Lief, Tot zijn gherief,
Tot Schoolenaer, Ick wou, &c.
’t Slot Heemste en Hillegom blanck,
De Zillick ende Voghele-sanck,
In een groen Wout, In’t Eerden Hout,
Speeltmen op snaer, Ick wou, &c.
Berckero wel gheleghen is,
Voor die Reyghers fraey ghewis,
Kraeynest, Item // Ierusalem,
Emaus komt naer, Ick wou, &c.
’t Haerlemmer-Bos is wel beplant,
Met Huysen rondt-om aen den kant,
Tot elcks solaes // Voedtsel en aes,
Vindtmer eerbaer, Ick wou, &c.
Oorlof hier mee voor het lest
Het dunckt my altijdt Sondaeghs best,
Dan isser vreught // Al by de Ieught,
Al by malkaer, Ick wou dat altijdt, &c.
|
|
Auteursrechtvrij
