De Gulden Passer. Jaargang 58-59

38. De gheleerde straffen d'ongeleerde.

Mercurius der Boden bode en bediedere

Heeft aende drooge Riuiere Xanthus befaemt
Latonam gevonden, en als een wijs bespiedere
Haer vermant, dat sy sou vlieden onbeschaemt
Eer sy door Iunoos haet noch meer werde gepraemt.
Want haer Iuno van haren wapenen hadde berooft
D'welck sy ooc geclaecht had' den god Iupiter genaemt.
Mercurius is cloeck van verstande somen gelooft,
Hebbende een stercke memorie in t'hooft,
Waerom dat hy ooc een bode der Goden gestelt is.
Contrarie so heeft de vergetelheyt verdooft
Diane den naem gegeuen, die de Mane gespelt is,
En van vochticheyt en coude te seer gequelt is.
Maer dat dese twist aen Xanthus de riuiere
Eerst begonste. bediet (so ons vertelt is)
Dat de hitte gemengt met vochticheyt schiere
Beter is: want den gheest is van dier maniere
Dat hy verwect wort door weynich voetsel siet,
En belet door coude vochticheyt putertiere:
Oock en isser by s'viers cracht te gelijcken niet,
D'welck niet sonder ghetempert elcken t'leuen biet.