Het godshuis van Sint-Jan & Sint-Pauwel te Gent, bijgenaamd de Leugemeete

Oorkonden

3. 1334. - Stichting eener kapelrij door Jacob van der Hasselt.

Ic Jacop van der Hasselt, chastelain van Ruplemonde ende proviseerre van Sente Janse wangelists ende van Sente Pauwels hospitale in Ghend, staende bi der Waelbrugghen, doe te wetene ende maeke kenlic allen den gheenen die dese lettren zien zullen ende horen lesen, dat ic hebbe ghegheven ende gheve, mijnsdancs ende bi minen propren wille, omme Gode ende in aelmoessenen, den here Willemme van Coudenbrouc, den heere Heinrike van der Dormen, den heere Janne van Wijendike ende Symoene van Bursbeke, die onse ghezellen waeren int vors. hospi-

[p. 8]

tail te dien tiden, eene somme van ghelde die ic gaf den vorseiden personen, omme te coepene sesse pond parisise siaers euwelike staende teere cappelrien bouf ende ten outaere die ic ghesticht hebbe ende ghefundeert int vors. hospitail, staende bi den core; de welke ic hebbe ghegheven ende upghedreghen omme Gode in in (sic) aelmoessenen, in presencen van mijn here den deken van den kerstenhede in Ghend, in dien tiden, minen lieven vriend, den here Boudine van Lederne, den caplaen, omme te verdienne over de ziele van minen lieven vriend te sinen live; van den welken sesse ponden parisisen de vors. persone ghecocht hebben drie pond ende een half pond parisise siaers ter cappelrien bouf vors. jeghen Janne ser Brandijns van Colenghem, die hem verstorven van meester Janne van Colenghem, sinen oem was, die gheleghen sijn int heersceep van Zomerghem, ghelijc dat se de gheene ghelden jaerlijx die de drie ponden ende een half pond paris. siaers sculdech sijn; vort moeten de proviseerres van den hospitale vors., die nu sijn, ende hier na wesen zullen, gheven ende ghelden den heere Boudine vors. vijftich schelghe paris. siaers, tote den drien ponden ende een half ponden paris. siaers, toter wilen dat de sesse pond parisise siaers al (ghe)cocht sijn ende beset. In orconscepen ende in kenlijcheden der waerheid so hebbic, Jacob van der Ha(sselt, c)hastelain ende proviseerre vors. in dien tiden, dese lettren gheseghelt met minen seghele ute (hanghende.)Ende omme de meerre sekerhede, so biddic neerentstelike mijn here den deken vors. dat hij (.....) wille hanghen sinen seghel metten minen in kenlijcheden der waerheid. Ende omme de neerentste bede (van) den castelain ende van den proviseerre vors., so hebbic, Jacob, deken van den kerstenhede van Ghend, vorseid, dese

[p. 9]

lettren gheseghelt met minen seghele vtehanghende met scastelains ende sprouiseerres vors. seghele, in kennessen der waerheid.

Ghegheuen ende ghedaen int jaer ons heren alse men screef M.CCC. viere ende derttich, sdijssendaeghs na de feeste van der Triniteit.

(Op den rug; geschrift van de XIV^de eeuw) Lr̄e de quibusdā legatis ad fūdatōem capellā nūc applicatis ad capellaniā dudū fūdatā in hospitali sc̄i jōhis.

Oorspronklijk stuk op perkament; de twee zegels in rauw was, aan dubbele staarten gehecht, zijn teenemaal gebroken. (Staatsarchief te Gent. Abdij van S^t-Baafs. Fonds Van Lokeren.)

Bij Diericx, Mémoires, t. II, p. 597; Van Lokeren, Chartes et documents de l'Abbaye de Saint-Bavon, p. 59.