Het godshuis van Sint-Jan & Sint-Pauwel te Gent, bijgenaamd de Leugemeete

Oorkonden

1^bis. 1333 (1332 o. st.) - Bevestiging van de stichting.

An alle de ghene die dese lettren sullen sien ende horen lesen, scepenen van der stede van Ghend salut in Onsen Here met kennessen der wareden. Alse voer ons siin comen in propren personen der Boudin van Lederne, pape, Philips van Calkine, der Hughe de Plonghere, Lieviin Baraet, Willem van Oesterzele ende Gillis de Scheene, onse porteren, gouvernerres ende beleeders van den huus an de Waelbrugghe, dat ghesticht es in

[p. 3]

de here van sente Janne ewanghelisth, alsoe sii seiden ende alsoe het schiint in eenen chartere die sii ons tochden gans ende gheheel, de welke hier naer volghet: (Zie n^r 1).

‘....Ende hebben nerestelike beghert dat dat huus voerseit ghemaecht sii, ghesticht ende staende blive tallen daghen, in de heere ende in de werdechede van sente Janne voerseit ende van sente Pauwelse apostele, ende ons versocht dat wii dit willen kennen, consenteren ende loven ende confermeren alle dese dinghen ende elc voerseit; weten alle dat wii, ten versouke ende beden van den gouvernerres ende beleeders voerseit, de constructie ende machele van den huus voerseit, ghesticht in de heere van sente Janne ende van sente Pauwelse apostelen voerseit, ende alle de dinghen ghehouden in den chartere voerseit ende elc, loven, approuveren ende confermeren gheliich sii ghemaecht siin ende ghescreven, met orconscepen van desen lettren, beseghelt, huuthanghende metten seghele van der stede van Ghend voerseit; die waren ghemaecht ende ghegheven tsaterdachs naer aschdach, int jaer Ons Heren alsmen screef dusentech drie hondert ende twee ende dertech.

J. Clerc.

Oorspr. op perkament, zegel afgevallen (Stadsarchief van Gent, n^r 288, inv. van de charters.) - Ook bij Diericx, p. 596.