Het godshuis van Sint-Jan & Sint-Pauwel te Gent, bijgenaamd de Leugemeete

Oorkonden

[p. 1]

1. 1316 (1315, o. st.). - De schepenen der stad Gent stemmen toe in de stichting van het godshuis.

Wij scepenen van der stede van Ghend, maken cont ende kenlic allen den ghenen die dese jeghewordeghe lettren sullen sien ofte horen lesen, dat wij, bi den neresten versouke ende beden van vele goeden lieden onsen porteren, bi voersienecheden wel gemouvert in Onsen Here, die in de heere ende in de werdechede vanden groeten sente Janne ewangheliste, een huus hebben begonnen stichten an de Waelbrugghe, binnen den scependoeme van Ghend, daer toe gheven onse consent ende doen onse vrihen wille dat dat ghestichte vulcome naer dordenanche van den ghenen ghemeenlike die principale siin van den ghestichte voerseit; dat es te verstaene, so wie so int voerseide huus wille comen ende hi werde ontfaen naer de voerseide ordinanche omme persoenlike residentie daer in te doene, so wat goede dat hi der in brincht ofte den voerseiden huus bewiist, siint katele, have ofte herve, alwildi namaels der ute trecken, dat dat voerseide goet bliven sal gheheellike ende al den voerseiden huuse, onghemindert ende sonder last, in hulpen ende sustinanchen den huus voerseit. Ende ware

[p. 2]

dat sake dat hymene dullike, bi quaden rade, dese ordenanche wilde breken ofte daer jeghen steken bi eneghen engiene, in so wat maniren dat ware, dien soude men corrigieren ende bedwingen bi den gouvernerres van den huuse voerseit ende bi den rade ende hulpen van ons, up dat siit an ons versochten, alse verre alse ment ons kenlich mochte maken ende ons toebehoeren soude; behouden allen goeden poincte, die men noch der toe mach doen ende maken ten proufiite van den voerseiden huuse ende bi den rade van ons ende onsen nacommers scepenen van Ghend; ende omme dat wij scepenen voerseit, willen dat alle dese voerseide dinghen bliven vast, seker ende ghestade, so hebben wij dese lettren beseghelt metten seghele van der stede van Ghend voerseit; die waren ghemacht ende gheheven int jaer Ons Heren doe men screef dertien hondert ende viiftiene, den neghenden dach van inghanch van maerte.

Onder den volgenden vidimus. - Ook bij Diericx, Mémoires sur la ville de Gand, t. II, p. 595.