De Gids. Jaargang 102

[p. 239]

Die seemeeu

Tussen die wit huis
en die wit huis,
teen die wit wolk,
teen die grys berg
hoog bo die see,
silwer en grys
silwer en grys
tot die verste vaal
horisonne heen,
styg en daal,
styg en daal
die wit seemeeu
aaneen
alleen....

Wat sing die see?
Wat kla die wind?
Wat roep die meeu?
Wat snik die hart
aaneen
alleen?

Die hart snik
tussen die wit huis
en die wit huis
op die helder dag,
silwer en grys,
silwer en grys:
waarheen?
waarheen
aaneen
alleen, alleen, alleen?

Uys Krige