De gheestelycke vryagie

Den willecom van Iesus in't Heyligh Sacrament der Catholijcken Coninck.

Ziet uvven Coninck komt v ter salicheyt,
Gaet hem te ghemoete, die Godt is inder eeuvvicheydt.

Comt, comt terstont hier alle Menschen,
Comt dient den besten Coninck diemen mocht wenschen.
Hy comt v verlossen wt alle noodt:
Staet oppe, comt alle cleyn en groot,
Arme en Rijcke, Ionck en Oudt,
Maechden en Weduwen, en die zijn ghehoudt.
Desen Coninck bouen al machtich en rijck
Is kommende voor een yeghelijck //
En slapet dan niet langher, laet alle werck
Gaet hem te ghemoete, die ghenoech is sterck
En ghewilligh om v alle te verlossen
Wt de tanden van die helsche Vossen,
's Duyuels Ministers Caluinisten
Vol wreetheyt, boosheyt en alle listen.
Comt heet hem willecom van alle kanten,
Hy is het Hooft van Sanctinnen en Sancten.
Comt hem nv groeten met klaer bescheedt,
Die uwen wille te doen is wel bereedt.

[p. 371]

 

Al v begheerten can hy volbringhen,

 

Want hy is Meester van alle dinghen,

 

Hy weet remedie, middel, en raedt,

 

Teghen alle swaericheyt, euel en quaedt:

 

Hy can v in als helpen metter daedt.

 

Hoe can hy t'huys blyuen die dit verstaet?

 

Hy tooght dat hy is ongheloouigh oft quaet,

 

Die dees komste weet, en niet op en staet.

 

Soo verre als hy wel heeft de macht om gaen.

 

Wie en sou desen Coninck niet wel gade slaen,

 

Ende waernemen sonder belet,

 

Om hem te offeren zijn Ghebedt?

 

Die om alle menschen komt te helpen,

 

En wilt een yeghelijcx begheerte stelpen.

 

Aenmerckt zijn macht en goeden wille:

 

Maeckt datter van v niet en kom' gheschille:

 

Tooght dat ghy ghelooft en goet zijt van wille,

 

Soo krijght ghy paeys sonder gheschille,

 

Al zijt ghy vol sonden ende ghebreken:

 

Een verootmoedich hert' en can hy niet versteken.

 

Hy is d'Lammeken Gods vanden Vader ghesonden

 

Om te ghenesen alle wonden,

 

En te weeren alle v sonden

 

By daghe, by nachte, t'allen stonden:

 

Hy is eenen almachtighen Medicijn,

 

Voor wien alle sieckten om ghenesen wel zijn,

 

Hy can oock wel weeren alle smerte

 

Hy en begheerter niet voren dan v herte.

 

Leght voortaen aen hem alle v sinnen,

 

Pooghende bouen al hem te beminnen.

 

Ghy sult hem zijn willecom, hoe arm van goede

[p. 372]

 

Dat ghy zijt, ist dat ghy zijt rijck van moede

 

En wille oft begheerte groot,

 

Om hem lief te hebben, wiens liefde is noot.

 

Comt tooght v liefde, wilt hem ghemoeten,

 

Comt heet hem willecom, komt hem groeten,

 

En wilt zijn eere niet verminderen,

 

Haelt hem oock inne ghelijck de kinderen

 

Die lieten heur suyghen, en ginghen singhen:

 

Willecom Schepper van alle dinghen,

 

Willecomme die komt inden naem des Heeren,

 

Laet v van dese kinders leeren

 

Oft ghy blijft beschaemt by den Heer der Heeren,

 

Daerom wilt den volghenden Willecom leeren.