Een gheestelijck lust hofken

Met schoone lieffelijcke geestelijcke ghesanghen beplant, door eenen Catholijcken pastoor

Vanden Heylighen Geest. Veni creator Spiritus.

Op de wijse: Venus du ende dein kindt.

COmt Schepper heylich Geest,
Vermaeckt ons in u feest,
Besoeckt ons droeve herten,
Troost ons in pijn en smerten
Wilt ons verstant verlichten
Ons krancken wilt oprichten.

Ghy zijt den Trooster teer

Die Christus onsen Heer,
Belooft heeft als hy scheyden
Om ons alhier te leyden,
Den vyandt te verdrijven,
Ons eewich by te blijven.

Ghy zijt Gods gave schoon,

Ghedaelt wt 's Hemels troon
Een levende Fonteyne,
Die ons kan maken reyne,
Een liefden-vuyr waerachtich,
Ontsteeckt ons herte crachtich.
V seven gaven fijn,
Laet ons deelachtich zijn,
[U] vinger van ons handen
[O]ntbindt der sonden banden,
[L]eert ons met nieuwe talen

[p. 64]

 

V lof en eer verhalen.

 

O troostelick Advocaet

 

Comt ons altijt te baet,

 

En leert ons crachtich bidden,

 

Besidt ons hert int midden,

 

Leydt ons in u secreten,

 

V wille doet ons weten.

 

Salft ons met graci soet

 

Neemt ons in u behoet,

 

Neemt in al ons gedachten

 

By dagen en by nachten,

 

Bluscht wt den brant der sonden,

 

Gheneest al onse wonden.

 

Verjaecht den vyant wijt,

 

Helpt ons in onsen strijdt,

 

V vrede wilt ons geven

 

Doet ons gerustich leven

 

En als wy moeten scheyden,

 

Ten Hemel wilt ons leyden.

 

Geeft ons een kennis schoon

 

Van Vader met den Soon,

 

Laet ons oock t'allen tijden

 

V heylich Geest belijden,

 

Dat ghy een Godt almachtich

 

Zijt alle drie waerachtich.