Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde ick heb ghesien eenen nieuwen hemel ende nieuwe eerde. Want den iersten hemel ende dierste eerde is vergaen, ende die zee en is nu niet meer.

+ A

+ 2

Ende ick Iohannes heb ghesien die heylighe stadt Ierusalem nieu, nederdalende vanden hemel van Gode bereydt als een bruyt verciert voer haren man.

3

Ende ick heb ghehoort een groote stemme vanden throon segghende, Siet het tabernakel Godts met die menschen, ende hy sal met hen woonen, ende sij sullen sijn volck sijn. Ende hy Godt selue met hen, sal hen Godt sijn,

4

ende Godt sal van haren ooghen alle tranen af vaghen, ⁺ende die doot en sal voertaen niet meer wesen, noch iammerlijck gheclach, noch gheroep, noch pijne en salder meer sijn, die ierst wech ghegaen sijn.

+ B

5

Ende die inden throon sadt heeft gheseyt, Siet ick maect al nieu. * Ende hy heeft my gheseyt, Scrijft want dese woerden sijn seer gheloouelijck, ende warachtich.

6

Ende hy heeft my gheseyt, Het is ghedaen. Ick ben Alpha ende O, tbeghinsel ende deynde. Ick sal den dorstigen gheuen wt die fonteyne vanden water des leuens om niet,

7

Soe wie verwint die sal dese dinghen besitten, ende ick sal hem een Godt wesen, ende hy sal my een sone sijn.

8

Maer den veruaerden, ende ongheloouighen, ende veruloecten, ende den dootslaghers, ⁺ende den hoereerders, ende den toouenaers, ende der afgoden dienaers, ende allen den loghenaers, hen deel sal wesen inden berrende poel met vier ende solfer, dwelck is die tweede doot.

+ C

9

Ende daer is ghecomen een vanden seuen enghelen hebbende die scalen vol van die seuen laetste plaghen, ende hy heeft met my ghesproken, segghende, Coemt ende ick sal v toonen die bruyt, des lams huysvrouwe.

10

Ende hy heeft my opghehauen inden gheest op eenen grooten ende hooghen berch. Ende hy heeft my ghetoont die heylige stadt Ierusalem nederdalende wt den hemel van Gode,

11

hebbende Godts claerheyt, ⁺ende haer licht was gelijc den costelijcken gesteente, als den Iaspis steen, ghelijck cristalijn.

+ D

12

Ende sij hadde eenen grooten ende hooghen muer hebbende twaelf poorten. Ende in die poorten twaelf enghelen, ende namen daer op ghescreuen, welck sijn die namen van die twaelf gheslachten der kinderen van Israel.

13

Vanden oosten drij poorten. Ende van noorden

[p. *924]

drij poorten. Ende van tsuyden drij poorten. Ende vanden westen drij poorten.

14

Ende den muer der stadt hadde twaelf fundamenten, ende in die, twaelf namen van die twaelf Apostelen des lams.

15

Ende die met my sprack. Hadde een mate van een gulden riet, dat hy meten soude die stadt, ende haer poorten, ende den muer.

16

⁺Ende die stadt is int viercant ghestelt, ende haer lengde is soo groot als haer breydde. Ende hy heeft die stadt ghemeten met dat riet tot twaelf duysent stadien, ende haer lengde ende hoochde ende breydde sijn al ghelijck.

+ E

17

Ende heeft haren muer ghemeten van hondert vierenveertich cubitus nae die mate van eenen mensch welck is des enghels.

18

Ende die timmeragie van haren muer was vanden steen Iaspis, maer die stadt was suyuer goudt, ghelijck suyuer ghelas.

19

Ende die fundamenten van der stadt muer waren met alderley costelijcke ghesteenten verciert. ⁺Het ierste fundament was Iaspis. Het tweede Sapphirus. Het derde Calcedonius. Het vierde Smaragdus.

+ F

20

Tvijfste Sardonix. Tseste Sardius, Tseuenste Chrysolitus. Het achtste Berillus. Het neghenste Topasius. Het thienste Chrysoprasus. Het elfste Hyacinthus. Het twaelfste Amethystus.

21

Ende die twaelf poorten sijn twaelf peerlen, tot elcken besonder, ende elck poorte was wt een besondere peerle. Ende die strate der stadt was suyuer gout als doerscijnende ghelas.

22

Ende gheenen tempel en heb ick in haer ghesien. Want die Heere Godt almachtich is haren tempel ende dlam.

23

Ende die stadt en behoeft sonne noch mane dat die in haer lichten soude. ⁺Want Gods claerheyt heeft haer verlicht, ende haren lichter is dlam.

+ G

24

Ende die Heydenen sullen wandelen in haer licht, ende die coninghen der eerden sullen hen glorie ende eere tot haer brenghen.

25

Ende haer poorten en sullen niet ghesloten worden inden dach. Want daer en sal gheenen nacht sijn.

26

Ende sij sullen die glorie ende eere der Heydenen in haer brenghen.

27

In haer en sal niet comen iet dat besmet is, oft afgrijsselijcheyt doende, ende loghene, dan die ghescreuen sijn, int boeck des leuens des lams.