Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ENde hy heeft my ghetoont eenen stroom des leuende waters blinckende ghelijck cristael, comende voerts wt den stoel Godts ende des lams.

+ A

2

Int midden van haer strate, ende aen beyde die sijde des vloets den boom des leuens, voertsbrenghende twaelf vruchten, tot elcke maent besonder gheuende sijn vrucht, ende die bladeren des booms tot die ghesontheyt der Heydenen.

3

Ende alderley maledictie en sal voerts niet meer wesen. Ende die stoelen Godts ende des lams sullen in haer wesen, ende sijn knechten sullen hem dienen.

4

Ende sij sullen sijn aensicht sien, ende sijnen naem in hen voerhoofden.

5

Ende den nacht en sal voerts niet meer wesen, ende sij en sullen het licht des lichters niet behoeuen, noch het licht der sonnen, want die Heere Godt verlichtse, ende hy sal regneren in die eewicheyt der eewicheden.

6

⁺Ende hy heeft my gheseyt, dese woerden sijn dalder gheloouelijcste, ende warachtich. Ende die Heere van die gheesten der propheten heeft sijnen enghel ghesonden om te toonen sijnen dienaren tghene datter corts ghescieden moet.

+ B

7

Ende siet ick come rasschelijck. Salich is hy die bewaert die prophetie van desen boeck.

8

Ende ick ben Iohannes die dese dinghen ghehoort ende ghesien hebbe. Ende na dat ict ghehoort ende ghesien hadde, soe ben ick nedergheuallen om dat ick aenbidden soude voer des enghels voeten, die my dese dinghen toonde,

9

ende hy heeft my gheseyt. Siet toe dat ghijt niet en doet. Want ick ben v medeknecht, ende uwer broederen der propheten, ende der gheender die bewaren die woerden van deser prophetien. Aenbidt Godt.

10

Ende hy seyt my, En teekent die woerden van der prophetien dees boecs niet, want den tijt is na by.

11

⁺Wie hindert die hindere al noch, ende wie in vuylicheden is, die werde noch vuyl, ende die rechtuerdich is de werde noch gherechtuerdicht, ende die heylich is die werde noch gheheylicht.

+ C

12

Siet ick come ter stont ende mijnen loon is met my, om te betalen eenen ieghelijcken nae sijn wercken.

13

Ick ben Alpha ende O, dierste ende die laetste, tbeghinsel ende deynde.

14

Salich sijn sij die hen langhe cleederen wasschen, op dat hen macht sijn mach int hout des leuens, ende dat sij doer die poorten moghen gaen in die stadt.

15

Buyten sijn die honden ende toouenaers ende die oncuysche, ende dootslaghers, ende den afgoden dienende, ende alle die bemint ende doet die loghene.

16

Ick Iesus heb mijnen enghel ghesonden dese dinghen v lieden te betuyghen in die kercken. Ick ben die wortel ende tgheslachte van Dauid. ⁺Een blinckende ende morghenstont sterre.

+ D

17

Ende den gheest ende die bruyt segghen, Coemt, Ende diet hoort die segghe, Coemt, Ende wie dorst heeft die come, ende wie wilt, die ontfanghe het water des leuens om niet.

18

Want ic betuyghe alle die hoorders van den boeck deser prophetien, Dat soo wie iet toe doet tot dese dinghen, ouer dien sal Godt toe doen dese plaghen die ghescreuen sijn in desen boeck.

19

Ende eest dat iemant vermindert die woerden van den boeck deser prophetien, diens deel sal Godt wech nemen vanden boeck des leuens, ende van die heyleghe stadt, ende van die dinghen die ghescreuen sijn in desen boeck,

20

seyt hy die ghetuyghenisse gheuet van desen dinghen. Iae oock ick come gheringhe. Amen. Coemt Heere Iesu.

21

Die gratie ons Heere Iesu Christi sij met v allen. AMEN.

Hier is voleynt dat boeck Apocalipsis van Sint Ian Euangelist.

Ghedruct in die vermaerde Vniuersiteyt ende stadt van Louen by my Bartholomeus van Graue. Int iaer ons Heeren. M.CCCCC.XLVIII.