Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺HIer nae heb ick ghehoort als een stemme van veel scaren inden hemel segghende, Alleluyia, Lof, ende glorie, ende cracht behoirt onsen Godt.

+ A

2

Want warachtich ende rechtuerdich sijn zijn ordeelen, die recht ghedaen heeft van die groote hoere, die deerde verdoruen heeft met haer hoereringhe, ende heuet dbloet van sijnen heylighen ghewroken, wt haren handen.

3

Ende sij hebben wederom gheseyt, Alleluyia. Ende haren roock climt tot die eewicheden der eewicheden.

4

Ende die vierentwintich ouders, ende die vier dieren sijn nedergheuallen, ende hebben Godt sittende opden throon aenghebeden, segghende, Amen, Alleluyia.

5

Ende daer is een stemme vanden throon wtghegaen segghende, Segt lof onsen Gode alle sijn dienaers, ende die Godt vreest, cleyn ende groot.

6

Ende ick heb ghehoort een stemme als van een groote scare, ende ghelijck een stemme van veel wateren, ende ghelijck een stemme van groote donderen, segghende, Alleluyia. Want die Heere onse Godt almachtich heeft gheregneert.

7

⁺Laet ons blijde sijn, ende hem glorie gheuen, want die bruloft des lams is ghecomen, ende sijn huysvrouwe heeft haer bereyt.

+ B

8

Ende haer is ghegheuen datse haer sal cleeden met costelijck lijnwaet, blinkende ende wit. Want dat fijn lijnwaet, is die rechtuerdichmakinghe der Heyleghen.

9

Ende hy heeft my gheseyt, Scrijft, Salich sijn sij die tot dat auontmael van des lams bruloft gheroepen sijn. Ende hy seyt tot my, segt. Dese Godts woerden sijn warachtich.

10

Ende ick ben gheuallen voer sijn voeten, om dat ick hem aenbidden soude. Ende hy seyt tot my, Siet toe dat ghy dit niet en doet. Ic ben v mede dienaer ende uwer broederen die ghetuyghenis hebben van Iesu. Aenbidt Godt. Want Iesus ghetuyghenis is den gheest der prophetien.

11

Ende ick heb ghesien den hemel open, ende siet een wit peert ende die daer op sadt worde ghenoemt, Ghetrouwe, ende Warachtich, ende metter rechtuerdicheyt ordeelt ende strijdt hy.

12

Maer sijn ooghen sijn als een vlamme viers, ende op sijn hooft veel croonementen, hebbende eenen naem ghescreuen, den welcken niemant en kent dan hy.

13

⁺Ende Hi was ghecleedt met een cleedt bespraeyt met bloede, ende sijnen naem wort ghenoemt. Dwoert Godts.

+ C

[p. *923]

14

Ende die heyren die inden hemel sijn volchden hem op witte peerden, ghecleedt met witte ende suyuer lijnwaet.

15

Ende wt sijnen mont gaet een scerp sweert dat hy daer mede soude slaen die Heydenen. Ende hy salse regeren met een yseren roede, ende hy treedt die persse vanden wijn der rasender gramscap vanden torn Godts almachtich.

16

Ende hy heeft in sijn cleedt ende in sijn dgyie ghescreuen, Die coninck der coninghen, ende die Heere der heerscappen.

17

Ende ick heb ghesien eenen enghel staende in die sonne. Ende hy heeft gheroepen met grooter stemme segghende alle den voghelen die daer vloghen doert midden des hemels. Coemt ende vergadert v tot Godts groot auontmael,

18

dat ghy eten moecht dat vleesch der coninghen, ende tvleesch der hooftlieden, ⁺ende tvleesch van die stercken, ende tvleesch der peerden, ende der gheender die daer op sitten, ende tvleesch van allen vrije menschen, ende der slauen, ende der cleynder, ende der grooter.

+ D

19

Ende ick heb die beeste ghesien ende die coningen der aerden, ende hen heyren vergadert om eenen strijdt te houden teghen den ghenen die opt peert sadt, ende met sijnen heyre.

20

Ende die beeste is ghegrepen, ende met haer die valsche propheet, die teekenen ghedaen heeft voer hem doer die welcke hy verleydt heeft die ghene diet teeken der beesten ontfanghen hebben, ende die haer beelt aenghebeden hebben. Al leuende sijn dese twee gheworpen in den put des bernende viers, ende solfers,

21

ende die andere sijn verslaghen metten sweerde dat wten monde gaet van den ghenen die opt peert sidt, ende alle die voghelen sijn versaedt gheweest van haren vleesche.