Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ENde hier nae heb ick ghesien eenen anderen enghel nederdalende vanden hemel, hebbende een groote macht ende die eerde is verlicht gheweest van sijnder glorien.

+ A

2

Ende hy heeft luyde gheroepen met stercheyt segghende, Gheuallen gheuallen es die groote Babilon, ende sij is gheworden een wooninghe der duyuelen, ende een bewaringhe van alle onsuyuer gheesten, ende een be-

[p. *922]

waringhe van alle onreyn ende hatelijck gheuoghelte,

3

want van den wijn der gramscappen van haerder oncuyscheyt hebben alle die Heydenen ghedroncken, ende die coninghen der werelt hebben met haer oncuyscheyt bedreuen, ende die coopluyden der eerden sijn van die cracht haerder weldicheden rijck gheworden.

4

Ende ick heb ghehoort een ander stemme segghende, Gaet wt van haer mijn volck, op dat ghy niet deelachtich en wort haerder misdaden, ende dat ghy van haren plaghen niet en ontfanct.

5

Want haer sonden sijn ghecomen totten hemel toe. ⁺Ende Godt is ghedachtich gheworden haerder boosheden.

+ B

6

Betaelt haer wederom ghelijck sij v lieden ghedaen heeft, ende dobbelt haer dobbele nae haer wercken. Inden kelck daer sij in ghemenghet heeft menghet haer dobbel.

7

Soe seer als sij haer gheglorificeert heeft, ende in wellusticheden gheweest is, soo veel tormenten ende droefheden gheeft haer, want sij seyt in haer herte. Ick sitte een coninghinne, ende ick en ben gheen weduwe, ende ick en sal gheenen rouwe sien.

8

Daer om sullen haer plaghen op eenen dach comen, die doot, ende den rouwe, ende den hongher, ende sij sal metten vier verbrant worden. Want Godt is sterck die haer ordeelen sal.

9

⁺Ende die coninghen der aerden sullen weenen ende hen seluen beclaghen ouer haer, die met haer oncuyscheyt bedreuen hebben, ende in wellusticheden gheleeft hebben, als sij sien sullen den roock van haren brant,

+ C

10

van verre staende om die vreese van haren tormenten, segghende, Wee wee die groote stadt Babilon, die stercke stadt want op een vre is v ordeel comen,

11

ende die coopluyden der eerden sullen weenen, ende droeuich gheclach maken ouer haer, want hen ware en sal niemant voerts meer coopen,

12

dat coop goet des gouts ende siluers ende der costelijcker ghesteenten, ende der peerlen, ende des costelijcs lijnwaets, ende der purpuren, ⁺ende der sijden lakenen, scharlakenen ende alderhande Thyinen houten, ende alderley cyeraet van yuoor, ende alle ghereetscappe van costelijcken ghesteente, ende van metael, ende yser, ende marmorsteen,

+ D

13

ende caneel, ende der welriekender specien, ende der saluen, ende wieroocs, ende wijns, ende olien, ende terwen bloeme, ende tarwe, ende behelpigher beesten, ende scapen, ende peerden ende waghenen, ende slauen, ende sielen der menschen.

14

Ende dat begheerlijcke oeft uwer zielen is van v ghesceyden, ende alle vette ende wtnemende dinghen sijn van v vergaen, ende sij en sullen voertaen die niet meer vinden.

15

Die coopluyden deser dinghen die rijck gheworden sijn, ⁺sullen verre van haer staen, om die vreese van haren tormenten, weenende ende droeffelijck claghende,

+ E

16

ende segghende, Wee wee die groote stadt die ghecleedt was met costelijck lijnwaet, ende purpur, ende scaerlaken, ende vergult was met goude, ende met costelijck ghesteente, ende peerlen,

17

want in een vre sijn verdoruen soo grooten rijcdommen, ende alle stierman, ende alle die in staende wateren te scepe varen, ende die scipluyden ende die in die zee hanteringhe hebben, hebben verre ghestaen,

18

ende hebben gheroepen siende die plaetse haers brants, segghende, Wat stadt esser ghelijck deser grooter stadt?

19

⁺Ende sij hebben ghestubbe op hen hoofden gheworpen, ende hebben gheroepen al weenende, ende droeffelijck claghende, segghende, Wee wee die groote stadt, waer in dat rijck gheworden sijn alle die scepen hadden in die zee, van haren ghelde. Want op een vre is sij verwoest gheweest

+ F

20

Verhuecht v op haer ghy hemele, ende ghy heyleghe Apostelen ende Propheten, want Godt heeft v ordeel gheordeelt van haer.

21

Ende eenen stercken enghel heeft opghenomen eenen steen ghelijck eenen grooten molensteen, ende heeft dien in die zee gheworpen, segghende, Met sulcken storm sal gheworpen worden die groote stadt Babilon, ende sij en sal nu voerts niet meer gheuonden worden.

22

⁺Ende die stemme der herpslaghers, ende der musijck speelders, ende der pijpers, ende trompetslaghers en sal in v niet meer ghehoort worden, ende alle constich wercman van alderley consten en sal in v niet meer gheuonden worden, ende tgheluyt der molen en sal in v niet meer ghehoort worden,

+ G

23

ende dlicht des lichters en sal v niet meer schijnen, ende die stemme des brudegoms ende der bruyt en sal in v voerts niet meer ghehoort worden. Want v coopluyden waren die princen des lants. Want in v betooueringhen hebben alle die Heydenen ghedoelt.

24

Ende in haer is gheuonden tbloet der propheten ende der heyligen, ende van alle die ghene die ghedoot sijn op deerde.