Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺ENde daer is ghecomen een vanden seuen enghelen die de seuen scalen hadden, ende hy heeft met my ghesproken segghende, Coemt ick sal v toonen dat oordeel van die groote hoere, die op veel wateren sidt,

+ A

2

waer mede oncuyscheyt bedreuen hebben die coninghen der aerden, ende die op deerde woonen sijn droncken gheworden vanden wijn haerder oncuysheyt.

3

Ende hy heeft my wech gheuoert inden gheest in die woestijne. Ende ic heb ghesien die vrouwe sittende op een roode beeste, vol namen der blasphemien, hebbende seuen hoofden ende thien hornen.

4

Ende die vrouwe was al om ghecleedt met purpur, ende root scarlaken, ende vergult met goude, ende met costelijck ghesteente, ende peerlen, hebbende eenen gulden kelck in haer hant, vol afgrijselijcheyts ende onsuyuerheyts van haer oncuyscheyt.

5

⁺Ende in haer voerhooft eenen naem ghescreuen. Verholentheyt. Die groote Babylon die moeder der hoereeringhen ende afgrijselijcheden der eerden.

+ B

6

Ende ick heb ghesien die vrouwe droncken vanden bloede der heyleghen, ende vanden bloede van Iesus ghetuyghen. Ende ick ben verwondert gheweest doen icse ghesien hadde, met een groote verwonderinghe.

7

Ende die enghel heeft tot my gheseyt, Waerom sidij verwondert? Ick sal v segghen die verholentheyt vander vrouwen, ende van die beeste die haer draecht, die seuen hoofden heeft, ende thien hornen.

8

Die beeste die ghy ghesien hebt die is gheweest, ende sij en is niet, ende sij sal opclimmen vanden afgront, ende sij sal in die verderffenisse gaen, ende die op deerde woonen sullen hen verwonderen, ⁺(der welcker naemen niet ghescreuen sijn inden boeck des leuens van dat scepsel der werelt) siende die beeste, die was, ende niet en is.

+ C

9

Ende dit is den sin, die wijsheyt heeft. Die seuen hoofden sijn seuen bergen, daer die vrouwe op sidt, ende tsijn seuen coninghen.

10

Die vijue sijn gheuallen, die eene is, ende dander en is noch niet comen, ende als hy comen sal, soo moet hy eenen cleynen tijt blijuen.

11

Ende die beeste die was ende niet en is, ende sij is die achtste, ende sij is vanden seuenen, ende sij gaet in die verdoemenisse.

12

Ende die thien hornen die ghy ghesien hebt sijn thien coninghen die noch gheen rijck ontfanghen en hebben, maer sij sullen machticheyt als coninghen op een vre ontfanghen, nae die beeste,

13

dese hebben eenen raet ende cracht, ende hen macht sullen sij der beesten leueren.

14

Dese sullen thegen dlam strijden, ende dat lam salse verwinnen. ⁺Want het is een Heer der Heeren, ende een coninck der coninghen, ende die met hem sijn gheroepen, ende vercoren, ende gheloouighe.

+ D

15

Ende hy heeft my gheseyt, Die wateren die ghy ghesien hebt daer die hoere sidt dat sijn volcken, ende luyden, ende talen.

16

Ende die thien hornen die ghy ghesien hebt in die beeste. Dese sullen die hoere haten, ende sij sullense woest maken, ende naect, ende sullen haer vleesch eten, ende sij sullen haer metten vier heel verbranden.

17

Want Godt heuet in hen herten ghegheuen dat sij doen souden tghene dat hem behaghelijck is, op dat sij hen rijck souden gheuen der beesten, tot dat volbracht worden Godts woerden.

18

Ende die vrouwe die ghy ghesien hebt is die groote stadt, die trijck heeft ouer die coninghen der aerden.