Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ENde ick heb ghehoort een groote stemme vanden tempel segghende den seuen enghelen, Gaet ende stort wt die seuen scalen van Godts gramscap op die eerde.

+ A

2

Ende dierste is wech ghegaen, ende hy heeft sijn scale wt ghestort op die eerde, ende daer is gheworden een wreede ende seer quade wonde in die menschen die het teeken van die beeste hadden, ende in die ghene die haer beelt aenghebeden hadden.

3

Ende die tweede enghel heeft sijn schale wtghestort in die zee, ende tes gheworden bloet als van eenen dooden, ende alle leuende ziele is ghe-

[p. *921]

storuen in die zee.

4

Ende die derde heeft sijn scale ghestort op die vloeden, ende op die fonteynen der wateren, ende tis bloet gheworden.

5

Ende ick heb ghehoort den enghel der wateren segghende, Ghy sijt rectuerdich Heere die sijt, ende die waert heylich, dat ghy dit gheordeelt hebt,

6

want sij het bloet der heylighen ende der propheten wt ghestort hebben, ende ghy hebt hen bloet te drincken ghegheuen, want sij des weerdich sijn.

7

Ende ick heb ghehoort eenen anderen segghende, Iae oock Heere Godt almachtich, warachtich ende rechtuerdich sijn v ordeelen.

8

Ende die vierde enghel heeft sijn schale wtghestort in die sonne, ende hem is ghegheuen die menschen met hitten te pijnighen, ende met den viere,

9

ende die menschen hebben heet gheweest met grooter hitten, ⁺ende sij hebben gheblasphemeert den naem Godts, die macht heeft ouer dese plaghen, noch sij en hebben gheen penitentie ghedaen, dat sij hem die glorie souden gheuen.

+ B

10

Ende die vijfste enghel heeft sijn schale wt ghestort opden stoel van die beeste, ende haer rijck is duyster gheworden, ende sij hebben hen tonghen tsamen gheten van pijnen,

11

ende sij hebben Godt des hemels gheblasphemeert van haren pijnen ende wonden, ende sij en hebben gheen penitencie ghedaen voer hen wercken.

12

Ende die seste enghel heeft sijn schale wt ghestort in dien grooten vloet Euphrates. Ende hy heeft sijn wateren wt ghedroocht, om dat den wech soude bereydt worden den coninghen vanden opganck der sonnen.

13

⁺Ende ick heb ghesien wt den muyl des draecs, ende wten muyl der beesten ende wten mont vanden valschen propheet wtcomen drij onsuyuer gheesten ghelijck vorschen.

+ C

14

Want het sijn gheesten der duyuelen doende teekenen, ende sij gaen voerts tot die coninghen van gheheel aertrijck, om die te vergaderen ten strijde teghen den grooteu dach des almachtighen Gods.

15

Siet ick come als een dief, Salich is hy die waect, ende bewaert sijn cleederen, dat hy niet naect en wandele, ende dat sij zijn leelijcheyt sien.

16

Ende hy salse vergaderen ter plaetsen die int hebreusch ghenoemt is Armagedon.

17

Ende die seuenste enghel heeft sijn schale wtghestort in die locht. Ende daer is een groote stemme wtghecomen wten tempel vanden throon segghende, Het is ghedaen.

18

⁺Ende daer sijn ghesciet blixemen, ende stemmen, ende donderen, ende daer is een groote aertbeuinghe ghesciet, hoedanich noyt gheweest en is, van dat die menschen hebben begonnen te woonen op die eerde, sulcke aertbeuinghe soe groot.

+ D

19

Ende die groote stadt is gheworden in drij deelen, ende die steden der Heydenen sijn gheuallen. Ende die groote Babilon is ghecomen in ghedenckenisse voer Godt, om haer te gheuen den kelck van den wijn van die verbolghentheyt sijnder gramscappen.

20

Ende alle eylant is gheuloden, ende die berghen en sijn niet gheuonden.

21

Ende eenen grooten haghel ghelijck een pont is gheuallen vanden hemel op die menschen. Ende die menschen hebben Godt gheblasphemeert om die plaghe des haghels. Want die was seer crachtelijcken groot gheworden.