Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde ick heb een ander teeken ghesien inden hemel, groot ende wonderlijck, seuen enghelen hebbende die seuen laetste plaghen. Want in die is voleynt gheweest Godts gramscap.

+ A

2

Ende ick heb ghesien als een ghelasen zee met vier ghemenghet, ende die ghene die verwonnen hebben die beeste ende haer beelt, ende tghetal van haren naem staende op die ghelasen zee, hebbende Gods herpen,

3

ende singhende dliedeken van Moyses Godts dienaer, ende dliedeken des lams, segghende, Groot ende wonderlijck sijn v wercken Heere Godt almachtich, rechtuerdich, ende warachtich sijn v weghen coninck der eewicheden.

4

Wie en sal v niet vreesen Heere, ende niet grootmaken uwen naem? Want ghy sijt alleen goedertieren, want alle die heydenen sullen comen, ende aenbidden voer v aensicht, want v ordeelen sijn openbaer.

5

Ende hier nae heb ick ghesien ende siet, ⁺den tempel van dat tabernakel des ghetuyghenis es openghedaen inden hemel,

+ B

6

ende die seuen enghelen hebbende die seuen plaghen sijn ghegaen wten tempel, ghecleedt met eenen suyueren witblinckenden steen ende omgort omtrent die borsten met gulden gordelen.

7

Ende een vanden vier dieren heeft den seuen enghelen ghegheuen seuen gulden scalen, vol van den torn Godts die daer leeft in die eewicheden der eewicheden.

8

Ende den tempel werde veruult metten roocke van Godts maiesteyt, ende van sijnder cracht, ende niemant en conste gaen inden tempel tot dat volbracht waren die seuen plaghen van die seuen enghelen.