Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

+ 1

⁺ENde ick heb ghesien, Ende siet het lam stont opden berch Sion, ende met hem hondert vierenveertich duysent, hebbende sijnen naem, ende sijns vaders naem ghescreuen in hen voerhoofden.

+ A

2

Ende ick heb een stemme ghehoort vanden hemel als een stemme van veel wateren, ende als een stemme van eenen grooten donder, ende die stemme die ick hoorde, was als der herpslaghers spelende op hen herpen.

3

Ende sij songhen als eenen nieuwen sanck voer den stoel, ende voer die vier dieren, ende ouders, ende niemant en mocht dien sanck singhen dan die hondert vierenveertich duysent, die ghecocht sijn vander eerden.

4

Dit sijnse die metten vrouwen niet besmet en sijn gheweest. Want sij sijn maechden. Dese volghen dlam al waer dat gaet. Dese sijn ghecocht wt den menschen, tot ierste vruchten Gode ende den lamme,

5

ende in haren mont en is gheen loghene gheuonden, want sij sijn sonder smette voer den throon Godts.

* 6

Ende ick heb ghesien eenen anderen enghel vlieghende doert midden vanden hemel, hebbende dat eewich Euangelie, dat hy soude deuangelie preken den ghenen die op deerde sitten, ⁺ende op alle natien, ende gheslachte ende tale, ende volcke,

+ B

7

segghende met grooter stemmen. Vreest den Heere, ende gheeft hem eere, want die vre sijns ordeels is ghecomen, ende aenbidt hem die ghemaect heeft hemel ende aerde, die zee ende alle datter in is, ende die fonteynen der wateren.

8

Ende een ander enghel isser gheuolcht segghende, Gheuallen, gheuallen is die grootstadt Babilon, die vanden wijn der gramscappen haerder oncuyscheden te drincken heeft ghegheuen alle luyden.

9

Ende die derde enghel is desen ghevolcht, segghende met luyder stemmen. Eest dat iemant die beeste aenbidt ende haer beelt, ende ontfanct het teeken in sijn voerhooft, oft in sijn hant,

10

dese sal oock drincken vanden wijn des toorens Godts die ghemenghet is metten pueren dranck inden kelck van sijnen toren, ende hy sal ghepijnicht worden metten vier ende solfer in daensicht der heylegher enghelen, ende voer daenschijn des lams,

11

ende den roock van haren tormenten sal op climmen in die eewicheyt der eewicheden, noch sij en hebben gheen ruste dach ende nacht die die beeste ende haer beelt aenghebeden hebben, ⁺ende eest dat iemant ontfanghen heeft het teeken haers naems.

+ C

12

Hier is die patientie der heyleghen, die Godts gheboden onderhouden ende tghelooue van Iesu.

13

Ende ick heb een stemme ghehoort vanden segghende hemel tot my Scrijft, Salich sijn die dooden die inden Heere steruen, van nu voerts seyt den gheest dat sij rusten souden van haren arbeyden, want hen wercken volghen hen.

14

Ende ic heb ghesien, ende siet een blinckende wolcke, ende op die wolcke eenen sittende ghelijck den sone des menschen, hebbende op sijn hooft een gulden croone, ende in sijn hant een scerpe seysene.

15

Ende een ander enghel isser wt ghegaen wt den tempel roepende met luyder stemmen, totten ghenen die sadt op die wolcken, Slaet aen v seysene ende maeyt, ⁺want die vre is comen datment maeyen soude, want den oochst der aerden is drooghe gheworden.

+ D

16

Ende die op die wolcke sadt heeft sijn seysene gheslaghen op die aerde, ende die aerde worde af ghemaeyt.

17

Ende een ander enghel is wt ghegaen wten tempel die inden hemel is, oock hebbende een scerpe seysene.

18

Ende een ander enghel is wtghegaen wt den outaer die macht hadde ouer tvier, ende hy heeft met luyder stemmen gheroepen totten ghenen die die scerpe seysene hadde segghende, Slaet in v scerpe seysene, ende snijdt af die druyuen van den wijngaert der aerden, want sijn wijndruyuen sijn rijp.

19

Ende die enghele heeft sijn scerpe seysene gheslaghen op die eerde, ende hy heeft die druyuen afghesneden van den wijngaert der eerden, ende hy heeftse gheworpen inden grooten wijnput van Gods toren.

20

Ende dien wijnput is ghetreden gheweest buyten die stadt, ende daer is bloet gheloopen wt den wijnput, tot die toomen der peerden ouer duysent seshondert stadien.