Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde ic heb ghesien wter zee een beeste opclimmende, hebbende seuen hoofden, ende thien hornen, ende op haer hornen thien croonementen, ende op haer hoofden namen der blasphemien.

+ A

2

Ende die beeste die ick ghesien hebbe was ghelijc een Pardus, ende haer voeten waren ghelijck van eenen beyre, ende sijnen muyl al eens leeuws muyl, Ende den draeck heeft haer sijn cracht ghegheuen, ende groote macht.

3

Ende ick heb ghesien een van sijnen hoofden als dootlijc ghewont, ende haer dootlijcke wonde is ghenesen gheweest, Ende alle deertrijc heeft hem verwondert nae die beeste.

4

Ende sij hebben den draec aenghebeden, die der beesten macht ghegheuen heeft, ende sij hebben die beeste aenghebeden segghende. Wie is der beesten ghelijck? Oft wie sal moghen strijden teghen haer?

5

⁺Ende haer is eenen muyl ghegheuen sprekende groote dinghen ende blasphemien, ende haer is macht ghegheuen dat te doen tweenveertich maenden lanck,

+ B

6

Ende sij heeft haren muyl open ghedaen in blasphemien tot Godt, om te blasphemeren sijnen naem ende sijn tabernakel, ende die ghene die inden hemel woonen,

7

Ende haer is ghegheuen te strijden teghen die heylighen, ende die te verwinnen, Ende haer is macht ghegheuen in alle gheslachte ende volcke, ende tale, ende luyden,

8

ende sij hebbense alle aenghebeden, die op die eerde woonen, der welcker namen niet en sijn ghescreuen inden boeck van dleuen des lams, dwelck ghedoot is van tbeghinsel der werelt.

9

Heefter iemant ooren die hoore.

10

Die in ghenanghenisse gheleydt heeft, die gaet in die gheuanghenisse, die metten sweerde dootgheslaghen heeft, ⁺die moet oock metten sweerde ghedoot worden. Hier is die patientie ende tghelooue der heylighen,

+ C

11

Ende ick heb ghesien een ander beeste opclimmende vander eerden, ende sij hadde twee hornen ghelijc die hornen des lams, ende sij sprack ghelijck den draeck.

12

Ende sij dede alle die macht van dierste beeste voor haer aenschijn, ende si heeft die eerde ende die daer op woonen doen aenbidden dierste beeste, welcs dootlijcke wonde ghenesen is gheweest,

13

Ende si heeft groote teekenen ghedaen, also datse ooc heeft doen vier vanden hemel nederdalen op deerde, voor daenschijn der menschen,

14

Ende sij verleyt die inwoonders der eerden om die teekenen, die haer gegheuen sijn te doen voor daenschijn der beesten seggende den inwoonders der eerden, dat si maken souden een beelt der beesten die de wonde des sweerts heeft, ende gheleeft heeft,

15

⁺Ende haer is ghegheuen dat sij eenen gheest soude gheuen den beelde vander bee-

+ D

[p. *920]

sten, ende dat het beelt der beesten soude spreken ende dattet doen soude dat alle die ghene die niet en aenbade dat beelt der beesten, gedoot soude worden.

16

Ende si salse alle cleyne ende groote, ende rijcke ende arme, ende vrije, ende eyghen knechten, doen hebben een teeken in hen rechte hant, oft in hen voerhoofden,

17

ende dat niemant en sal moghen coopen oft vercoopen, dan die ghene die het teeken, oft den naem der beesten, oft het ghetal van haren naem hebbe.

18

Hier is wijsheyt, Wie verstant heeft, die rekene tghetal der beesten, want het is tghetal van eenen mensch, ende haer ghetal is ses hondertsessensestich.