Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde een groot teeken is gheopenbaert inden hemel. Een vrouwe ghecleedt metter sonnen ende die mane onder haer voeten, ende op haer hooft een croone van twaelf sterren,

+ A

2

ende beurucht sijnde riep sij wesende in barens noot, ende sij leedt pijne om te baren,

3

Ende daer is een ander teeken ghesien inden hemel. Ende siet eenen grooten rooden draeck hebbende seuen hoofden, ende thien hoornen, ende op sijn hoofden seuen croonementen,

4

ende sijnen steert trac het derden deel van die sterren des hemels, ende heeft die gheworpen op deerde, Ende den draec stont voor die vrouwe die baren soude, op dat hy, als si ghebaert hadde, haer kint soude verslinden.

5

Ende si heeft ghebaert een manlijc kint, dat regeren soude alle die Heydenen met een yseren roede, ⁺ende haer sone is opghenomen tot Godt, ende tot sijnen throon,

+ B

6

ende die vrouwe is gheuloden in die woestijne daer sij een plaetse hadde van Gode bereydt, datmen haer daer voeden soude duysent tweehondert ende tsestich daghen.

+ 7

Ende daer is eenen grooten strijdt ghesciet inden hemel. Michael ende sijn Enghelen streden teghen den draeck, ende den draeck street ende sijn enghelen,

8

ende sij en hebben niet machtich geweest, noch hen plaetse en is voorts niet meer gheuonden inden hemel.

9

Ende dien grooten draec het oude serpent, die ghenoemt wort die duyuel ende Satanas, die alle die gantsche werelt verleyt, is verdreuen ende hy is gheworpen in die eerde, ende sijn enghelen sijn met hem gheworpen.

10

Ende ick heb een groote stemme ghehoort inden hemel segghende. Nv is die salicheyt, ⁺ende die cracht, ende het rijc ons Gods gheworden, ende die macht van sijnen Christus, want die besculdigher onser broederen is verworpen, diese besculdichde voor daensicht ons Gods dach ende nacht

+ C

11

Ende sij hebben hem verwonnen door des lams bloet ende door dwoort van sijn ghetuyghenis, ende sij en hebben hen zielen niet lief gehadt totter doot toe.

12

Daerom verblijt v ghy hemelen, ende die daer inne woont.

* Wee der eerden ende der zee, want die duyuel is tot v lieden nederghedaelt hebbende eenen grooten torn wetende dat hy luttel tijts heeft,

13

Ende nae dat den draeck ghesien hadde dat hy gheworpen was ter eerden, soo heeft hy veruolcht die vrouwe die dat manlijc kint ghebaert hadde.

14

Ende der vrouwen sijn ghegheuen twee vloghelen van eenen grooten arent, ⁺dat sij vlieghen soude in die woestijne in haer plaetse, daer si gheuoet wort, eenen tijt, ende tijden, ende die helicht van eenen tijt van daensicht des serpents,

+ D

15

Ende tserpent heeft wt sijnen muyl nae die vrouwe water ghescoten als eenen stroom, om dat hy soude maken datse ghetrocken worde vander vloet.

16

Ende deerde heeft die vrouwe gheholpen, Ende die eerde heeft haren mont open ghedaen, ende heeft verslonden den vloet, die den draeck wt sijnen muyl gheworpen heeft,

17

Ende den draeck is gram gheworden teghen die vrouwe ende hy is wech ghegaen om te strijden teghen die andere van haren sade die Godts gheboden bewaren, ende hebben tghetuygenis Iesu Christi.

18

Ende hy heeft ghestaen op dat sandt der zee.