Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde my is ghegeuen een riet ghelijc een roede, ende my is gheseyt. Staet op, ende metet den tempel Gods, ende den outaer, ende die ghene die daer in aenbidden,

+ A

2

maer dat voorhof dat buyten den tempel is, worpt buyten, ende en metet dat niet, want het is den Heydenen ghegeuen, ende die heylige stadt sullen sy vertreden tweenveertich maenden.

3

Ende ick salt mijnen twee ghetuygen gheuen, ende sij sullen propheteren duysent twee hondert tsestich dagen ghecleet met sacken.

4

Dese sijn twee olijfboomen, ende twee candelaren, int aenschijn des Heeren van aertrijck staende,

5

Ende eest dat iemant hen wilt hinder doen, soo salder een vier wt haren mont gaen, ende sal hen vianden verslinden, ende eest dat iemant hen wilt quetsen, die moet alsoo ghedoot worden.

6

⁺Dese hebben macht den hemel te sluyten, dat niet en reghene in die daghen van hen prophetie, ende sij hebben macht ouer die wateren om die te verkeeren in bloet, ende die eerde te slaen met alle plaghe soo dicmael als sij willen,

+ B

7

Ende als si hen ghetuygenis sullen voleynt hebben, dan sal die beeste die vanden afgront opgheclommen is, teghen hen eenen strijdt houden, ende salse verwinnen ende hen dooden,

8

Ende hen lichamen sullen ligghen in die straten der grooter stadt, die gheestelijck ghenoemt wort Sodoma ende Egiptus, daer hen Heere ooc ghecruyst is gheweest,

9

Ende vanden gheslachten, ende luyden, ende talen, ende volcken sullen hen lichamen sien, drij dagen ende eenen haluen, ende hen lichamen en sullen sij niet laten leggen in die grauen,

10

Ende die op die eerde woonen sullen ouer hen blijde sijn, ende sij sullen vrolijck sijn, ende malcanderen ghiften senden, ⁺Want dese twee propheten hebben ghepijnicht die ghene die op die eerde woonden.

+ C

11

Ende nae drij daghen ende eenen haluen is den gheest des leuens van God in hen ghegaen, Ende sij hebben ghestaen op hen voeten, Ende een groote vreese heeft hen oueruallen diese ghesien hebben,

12

Ende sij hebben een groote stemme ghehoort wten hemel tot hen seggende. Climt herwaerts op, Ende sij sijn inden hemel gheclommen in een wolcke, ende haer vianden hebbense ghesien,

13

Ende in die vre isser een groote aertbeuinghe ghesciet, ende thiende deel der stadt is gheuallen, ende in die

[p. *919]

aertbeuinghe sijn seuen duysent menschen namen ghedoot, ende die andere sijn in vreesen gebracht, ende sij hebben Gode des hemels glorie ghegheuen.

14

Dat tweeden wee is wechghegaen, ende siet dat derde wee sal gheringhe comen,

15

Ende die seuenste Enghel heeft metten trompet gheslaghen, ende daer sijn groote stemmen inden hemel ghesciet segghende. ⁺Het rijck deser werelt is gheworden ons Heeren, ende sijns Christi, ende hy sal regneren in die eewicheyt der eewicheden Amen.

+ D

16

Ende die vierentwintich ouders die voor daenschijn Gods sitten in hen setelen, sijn gheuallen op hen aensichten, ende hebben God aenghebeden segghende.

17

Wy dancken v Heere Godt almachtich, die sijt, ende die waert, ende die comen sult, want ghy hebt ghenomen v groote macht, ende hebt gheregneert,

18

Ende die Heydenen sijn gram gheworden, ende uwen torn is aenghecomen, ende den tijt der dooden, om gheordeelt te worden, ende loon ghegheuen te worden uwen dienaren den propheten, ende heyligen, ende den ghenen die uwen naem vreesen, den cleynen ende grooten, ende om te vernielen die ghene die deerde verdoruen hebben,

19

Ende den tempel Gods is gheopent inden hemel, ende die arcke sijns testaments is ghesien gheweest in sijnen tempel, ende daer sijn ghesciet blixemen, ende stemmen, ende aertbeuinghen ende grooten haghel.