Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde ick heb ghesien eenen anderen stercken Enghel nederdalende vanden hemel, ghecleet met een wolcke, ende eenen regenboghe was op sijn hooft, ende sijn aensicht was ghelijc die sonne ende sijn voeten als een columne viers,

+ A

2

ende hy hadde in sijn hant een open boecxken, ende hy heeft sijnen rechten voet ghestelt op die zee, maer den slincken op die eerde,

3

Ende hy heeft gheroepen met luyder stemmen, ghelijck als eenen leeuw briescht, Ende als hy gheroepen hadde, soo hebben die seuen donderen hen stemmen ghesproken,

4

⁺Ende als die seuen donderen hen stemmen ghesproken hadden, soo soude ickse ghescreuen hebben, ende ick heb ghehoort een stemme vanden hemel segghende tot my. Seghelt toe tghene dat die seuen donderen ghesproken hebben, ende en wilt dat niet scrijuen,

+ B

5

Ende den Enghel die ick ghesien hebbe staende op die zee, ende op die eerde, heeft sijn hant opghehauen ten hemel,

6

ende heeft ghesworen bi den leuende in die eewicheyt der eewicheden, die ghescapen heeft den hemel, ende tghene datter in is, ende die eerde, ende tghene datter in is, ende die zee, ende tghene datter in is, ⁺datter gheenen tijt meer sijn en sal,

+ C

7

Maer in die daghen van die stemme des seuensten Enghels als die sal beghinnen metten trompet te slaen, dan sal voleyndt worden Gods verholentheyt, ghelijck hy vercondicht heeft door sijn knechten die propheten,

8

Ende ick heb ghehoort een stemme vanden hemel wederom sprekende met my, ende segghende. Gaet henen ende neemt den openen boeck van die hant des Enghels staende op die zee, ende op die eerde,

9

Ende ick ben ghegaen totten Enghel, segghende tot hem dat hy my den boec gaue, ⁺Ende hy heeft tot my gheseyt. Neemt den boec ende verslint dien, ende hy sal uwen buyck bitter maken, maer in uwen mont sal hy suet sijn als honich,

+ D

10

Ende ick hebbe den boeck ghenomen wter handt des Enghels, ende ick hebbem verslint, ende hy was in mijnen mont suet als honich, ende als ick dien verslint hadde, soo is mijnen buyc bitter gheworden,

11

ende hy heeft tot my gheseydt. Ghy moet weder propheteren den Heydenen, ende luyden, ende talen, ende vele coninghen.