Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde die vijfste Enghel heeft metten trompet gheblasen ende ick heb ghesien datter een sterre vanden hemel gheuallen was, ende haer is ghegeuen den slotel vanden put des afgronts,

+ A

2

Ende hy dede open den put des afgronts, ende den roock des puts is opgheclommen, als den roock van eenen grooten ouen, ende die sonne is verduystert geweest ende die locht vanden rooc des puts.

3

Ende wt den roock des puts sijnder sprinchanen ghegaen op die eerde, ende hen is macht ghegheuen, ghelijck die scorpioenen der eerden macht hebben,

4

ende hen is gheboden dat sij niet quetsen en souden tgras der eerden, noch alle groen ghewas, noch gheen boomen, dan alleen die menschen die Godts teeken niet en hebben in hen voorhoofden,

5

ende hen is ghegheuen dat sij die niet dooden en souden, maer datse ghepijnicht souden worden vijf maenden, ⁺ende hen pijninghe was ghelijck die pijninghe van een scorpioen alst een mensch quetst.

+ B

6

Ende in die daghen sullen die menschen die doot soeken, ende sij en sullen die niet vinden, ende sij sullen begheren te steruen, ende die doot sal van hen vlieden.

7

Ende

[p. *918]

die ghelijckenissen der sprinchanen sijn ghelijc peerden die bereydt sijn ten strijde, ende op haer hoofden als croonen, ghelijc den goude, ende haer aensichten waren ghelijck menschen aensichten,

8

ende sij hadden hayr ghelijck vrouwen hayr, ende haer tanden waren ghelijck leeuwen tanden,

9

ende sij hadden pansieren als yseren pansieren, ende dat gheluyt van haren vloghelen was als tgheluyt van veel waghenen der peerden loopende ten strijde,

10

ende sij hadden steerten ghelijck der scorpioenen, ⁺ende daer waren haecken in hen steerten ende hen macht was den menschen hinder te doen vijf maenden,

+ C

11

ende sij hadden ouer hen eenen coninc den Enghel des afgronts, die welcke ghenoemt was int Hebreeusch Abbadon, maer int Griecx Apollyon, in duytsche hebbende den naem vernielende.

12

Dat een wee is wech ghegaen, ende siet daer comen noch twee ween hier nae,

13

Ende die seste Enghel heeft metten trompet gheblasen, ende ick heb een stemme ghehoort wt die vier hoornen vanden gulden outaer, die daer is voor Godts oogen,

14

seggende totten sesten Engel die dat trompet hadde. Ontbint die seuen Enghelen die ghebonden sijn inden grooten vloet Euphrates,

15

Ende die vier Enghelen sijn ontbonden gheweest die bereedt waren teghen een vre, ende tegen eenen dach ende een maent, ende een iaer, dat sij dooden souden het derde deel der menschen,

16

Ende tghetal van dat heyr des peerdevolcs was twintich duysentmael thien duysent, Ende ick heb hen ghetal ghehoort.

17

Ende alsoo heb ick die peerden ghesien in een visioen, ende die daer op saten hadden vierighe, ende Iacinthinen, ende solferachtighe pansieren, ende die hoofden der peerden waren ghelijck der leeuwen hoofden, ⁺ende wt haren muyl ghinc vier, ende roock, ende solfer,

+ D

18

Ende van dese drij plaghen is ghedoot het derde deel der menschen, vanden viere, ende vanden roock, ende van den solfer, die wt haren muyl quamen,

19

Want der peerden macht is in haren muyl, ende in haren steerten, want hen steerten waren ghelijck serpenten hebbende hoofden, ende hier mede doen sij hinder,

20

Ende die ander menschen die niet gedoot en sijn in dese plagen, noch gheen penitencie ghedaen en hebben van die wercken haerder handen, dat sij niet aenbidden en souden die duyuels ende die gulden, ende silueren, ende metalen, ende steenen, ende houten afgodts beelden, die noch sien en moghen, noch hooren, noch wandelen,

21

ende sij en hebben gheen penitencie ghedaen van hen dootslagen, noch van hen roouerien, noch van hen oncuyscheyt, noch van hen dieuerien.