Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde alst den seuensten seghel open ghedaen hadde, soo isser een groote stillicheyt gheworden in den hemel, by nae een half vre,

+ A

2

Ende ick heb ghesien seuen Enghelen staende voor daenschijn Godts, ende hen sijn ghegheuen seuen trompetten,

3

Ende daer is een ander Enghel ghecomen ende heeft ghestaen voor den outaer, hebbende een gulden wieroockvat, ende hem sijn veel rueckofferanden ghegheuen, om dat hy gheuen soude van die ghebeden alder heylighen, opden gulden outaer die voor den throon Godts is,

4

⁺Ende den roock van die ontsteken rueckofferanden is opgheclommen van die ghebeden der heylighen, wt des Enghels hant voor Godt,

+ B

5

Ende die Enghel heeft dat wieroocvat ghenomen, ende dat gheuult met den vier des outaers, ende heeft dat gheworpen op deerde, ende daer sijn ghesciet donderen, ende stemmen, ende blixemen, ende groote aertbeuinghe,

6

Ende die seuen Enghelen die de seuen trompetten hadden, hebben hen bereyt dat si metten trompet blasen souden.

7

Ende dierste Engel heeft metten trompet gheblasen, ende daer is gheworden haghel, ende vier ghemenghet met bloet, ende tis gheworpen op die eerde, ende tderde deel der eerden is verbrant gheweest, ⁺ende tderde deel der boomen is verbrant gheweest, ende alle tgroen gras is verbrant gheweest,

+ C

8

Ende den tweeden Enghel heeft metten trompet gheblasen, ende ghelijck eenen grooten berch metten vier bernende is gheworpen in die zee, ende tderde deel der zee is gheworden bloet,

9

ende dat der derde deel der creatueren der gheender die leuen hadden in die zee is ghestoruen, ende het derde deel der scepen is verdoruen gheweest,

10

Ende die derde Enghel heeft metten trompet gheslaghen, ende daer is vanden hemel gheuallen een groote sterre berrende als een fackele, ende die is gheuallen int derde deel der waterstroomen, ende in die fonteynen der wateren,

11

ende den naem der sterren wert ghenaemt alsen, ⁺Ende het derde deel der wateren is verkeert in alsen, ende veel menschen sijn ghestoruen van die wateren, want sij sijn bitter gheworden,

+ D

12

Ende die vierde Enghel heeft metten trompet gheslaghen, ende tderde deel der sonnen werde gheslagen, ende tderde deel der manen, ende tderde deel der sterren, alsoo dat het derde deel van dien verduystert worde, ende dat des daechs derdendeel niet en lichte, ende des nachts desghelijcs,

13

Ende ick heb ghesien ende ghehoort die stemme van eenen vlieghenden aernt segghende met luyder stemmen. Wee, wee, wee den bewoonders der eerden, van die ander stemmen der drij Enghelen die metten trompet noch slaen souden.