Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺HIer nae heb ick ghesien vier Enghelen staende op die vier hoecken der aerden, houdende die vier winden der aerden, dat sij op deerde niet waeyen en souden, noch op die zee, noch op eenighen boom.

+ A

+ 2

Ende ick heb ghesien eenen anderen Enghel opclimmende vanden opganck der sonnen, hebbende het teeken des leuende Gods, ende hi heeft gheroepen met luyder stemmen den vier Engelen, den welcken ghegeuen is hinder te doen der eerden, ende der zee,

3

seggende. En wilt gheen hinder doen der eerden ende der zee, nocht den boomen, tot dat wij teekenen ons Gods dienaers in hen voorhoofden,

4

Ende ick heb ghehoort tghetal vanden gheteekenden, hondert vierenveertich duysent gheteekende, wt alle die gheslachten der kinderen Israel,

5

Wten gheslachte van Iuda, twaelfduysent gheteekende, Wten gheslachte van Ruben, twaelf duysent gheteekende, ⁺Wten gheslachte van Gad, twaelf duysent gheteekende,

+ B

6

Wten gheslachte van Aser, twaelf duysent gheteekende, Wten gheslachte van Nephtali, twaelf duysent gheteekende, Wten gheslachte van Manasse, twaelf duysent gheteekende,

7

Wten gheslachte van Simeon, twaelf duysent gheteekende, Wten gheslachte van Leui, twaelf duysent gheteekende, Wten gheslachte van Issachar, twaelf duysent gheteekende,

8

Wten gheslachte van Zabulon, twaelf duysent gheteekende, Wten gheslachte van Ioseph, twaelf duysent gheteekende, Wten gheslachte van Beniamin, twaelf duysent gheteekende.

9

Hier nae heb ick ghesien een groote scare, die niemant ghetellen en conste, ⁺wt allen volcken, gheslachten, luyden, ende talen, staende voor den throon ende voor daenschijn des lams ghecleet met witte langhe cleederen, ende palmen in hen handen,

+ C

10

ende sij riepen met grooter stemmen segghende. Salicheyt sij onsen Godt die daer sittende is op den throon ende den lamme.

11

Ende alle die Enghelen stonden rontsomme den throon, ende der ouderen, ende der vier dieren, ende sij sijn gheuallen voor daenschijn des throons op hen aensichten, ende sij hebben Godt aenghebeden

12

seggende. Amen. Ghebenedijdinghe, ende claerheyt ende wijsheyt, ende dancsegghinghe, eere ende cracht, ende stercheyt sij onsen Godt in die eewicheyt der eewicheden, Amen.

* 13

⁺Ende een vanden ouderen heeft gheantwoort, ende tot mi gheseyt. Dese die ghecleet sijn met langhe witte cleederen, wie sijnse? ende van waer sijn sij ghecomen?

+ D

14

Ende ick heb hem gheseyt. Mijn Heere ghy wetet, Ende hy heeft my gheseyt. Dit sijn sij die ghecomen sijn wt groote tribulacie, ende hebben hen langhe cleederen ghewasschen, ende wit ghemaect int bloet des lams,

15

daerom sijn sij voor den throon Godts, ende dienen hem dach ende nacht in sijnen tempel, ende die inden throon sidt die sal ouer hen woonen.

16

Sij en sullen voorts gheenen hongher meer lijden, noch dorst hebben, noch die sonne en sal op hen niet vallen, nocht eenighe hitte.

17

Want het lam dat int midden vanden throon is salse regeren, ende hy salse leyden tot die leuende fonteynen der wateren, ende Godt sal alle tranen afvaghen van haren ooghen.