Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde ic heb ghesien dat het lam open ghedaen heeft een vanden seuen seghelen, ende ick heb ghehoort een vanden vier dieren seggende als die stemme eens donders. Coemt, ende siet,

+ A

2

Ende ick heb ghesien, ende siet een wit peert, ende die daer op sadt hadde eenen boghe, ende hem is een croone ghegeuen, ende hy is wtghegaen verwinnende, om dat hy verwinnen soude

3

Ende doent den tweeden seghel open ghedaen hadde, soo heb ic ghehoort het tweede dier seggende. Coemt ende siet.

4

Ende daer is een ander root peert wtghegaen, ende die daer op sadt dien is ghegeuen dat hy den vrede nemen soude vander eerden, ende dat sij malcanderen souden dooden, ende hem is ghegeuen een groot sweert,

5

Ende alst den derden seghel open ghedaen hadde, soo heb ic het derde dier ghehoort seggende. Coemt, ende siet. ⁺Ende siet een swert peert, ende die daer op sadt hadde een waghe in sijn hant.

+ B

6

Ende ick heb ghehoort als een stemme wt dat midden der vier dieren seggende. Een mate van twee pont tarwen om eenen penninck, ende drij maten van twee pont ghersten, om eenen penninck, ende den wijn ende die olie en quetst niet.

7

Ende alst den vierden seghel open ghedaen hadde, soo heb ick ghehoort die stemme van dat vierde dier seggende. Coemt ende siet.

8

Ende siet een vael peert, ende die daer op sadt diens naem was die doot, ende die helle volchde hem, ende hem is macht ghegheuen ouer die vier deelen der eerden doot te slaen metten sweerde, honghere, ende doot, ende met die beesten der eerden,

9

Ende alst den vijfsten seghel open ghedaen hadde, soo heb ick ghesien onder den outaer die zielen der ghedooder om dwoort Godts, ⁺ende om tghetuyghenis dat si hadden

+ C

10

ende sij riepen met luyder stemmen segghende. Hoe langhe o Heere (heylich ende warachtich) en ordeeldi nocht en wreecti ons bloet niet van die ghene die op deerde woonen?

11

Ende hen sijn ghegheuen elc een wit lanck cleet, ende hen is gheseyt dat si rusten souden noch een luttel tijts, tot dat hen mededienaers souden veruult worden, ende hen broeders die ghedoot sullen worden ghelijck sij.

12

Ende ick heb ghesien alst den sesten seghel open ghedaen heeft, ende siet daer is een groote aertbeuinge ghesciet, ende die sonne is swert gheworden als eenen hairen sack, ende die mane is heel gheworden ghelijck bloet,

13

ende die sterren sijn vanden hemel gheuallen op die eerde, ghelijck eenen vijgheboom af laet vallen sijn vroeghe vijghen als hy van eenen grooten wint gheroert wort,

14

⁺ende den hemel is wech ghegaen ghelijck eenen opghevouden boeck, ende alle berghen ende eylanden sijn van hen plaetsen gheroert,

+ D

15

ende die coninghen der eerden, ende die princen, ende hooftluyden ouer duysent, ende die rijcke, ende die stercke, ende alle knechten, ende vrije menschen hebben hen seluen gheberghen in die speluncken, ende in die steenrootsen der berghen,

16

ende sij segghen den berghen ende steenrootsen. Valt op ons, ende verbercht ons van daenschijn des gheens die daer sidt opden throon, ende van die gramschap des lams,

17

want den grooten dach van haren toren

[p. *917]

is comen, ende wie sal moghen staen?